Тошкент, Ўзбекистон (UzDaily.uz) — IT Park Uzbekistan ва АҚШнинг Lincoln Labs технологик компанияси лойиҳаси бўлган Truss Ўзбекистонда Employer of Record (EOR) моделини қўллаш бўйича пилот лойиҳани ишлаб чиқади.
Томонлар Ўзбекистондан муҳандислик жамоаларини шакллантириш, мутахассисларни халқаро миқёсда ишга ёллаш ва Америка компаниялари фаолиятини кенгайтириш учун майдон сифатида фойдаланиш имкониятларини муҳокама қилди. Бу ҳақда IT Park Uzbekistan хабар берди.
Учрашувда IT Park экспортни ривожлантириш бошқармаси раҳбари Азамат Раҳмон-Зода, глобал бизнес хизматлари (GBS) йўналиши вакиллари, шунингдек, Lincoln Labs вакили Эрик Жиру ҳамда Truss вакили Илҳом Икромов иштирок этди.
EOR модели компанияларга мамлакатда ўз юридик шахсини ташкил этмасдан, расмий иш берувчи орқали мутахассисларни ишга ёллаш имконини беради.
Томонлар хорижий мутахассисларни жалб қилиш, масофадан ишлаш ва Ўзбекистондан ташқарида фаолият юритаётган ходимларга иш ҳақи тўлашни ўз ичига олган турли ишга жойлаштириш шаклларини кўриб чиқди.
Шунингдек, моделни амалга оширишнинг ҳуқуқий шартлари, жумладан, Президентнинг 286-сон фармони қоидалари алоҳида муҳокама қилинди. Truss билан амалга ошириладиган пилот лойиҳа EOR механизмининг амалиётда қандай ишлашини кўрсатиши керак.
Lincoln Labs технологик консалтинг йўналишини ривожлантирмоқда ва янги бозорларни синаб кўриш учун кичик дастурчилар жамоасини ташкил этиш имкониятини кўриб чиқмоқда.
Ўзбекистон компания учун эҳтимолий майдонлардан бири ҳисобланади. Lincoln Labs компаниясининг ҳаммуассиси ва техник директори Фаррух Умаров Ўзбекистондан чиққан. Truss эса халқаро компанияларга муҳандисларни топиш, ишга ёллаш ва уларни жамоаларга интеграция қилишда ёрдам беради.
IT Park вакиллари миллий IT-экотизим, резидентларнинг халқаро буюртмачилар, жумладан, UFC, HBO ва ESPN билан ишлаш тажрибаси ҳамда хорижий компанияларни қўллаб-қувватлаш механизмлари, шу жумладан, Softlanding дастури ҳақида маълумот берди.
Томонлар Америка бозоридаги ҳамкорлик масалаларини ҳам муҳокама қилди. Truss IT Park’ка эҳтимолий хорижий резидентлар билан алоқалар ўрнатишда ёрдам беришга ва Америка компанияларини Ўзбекистонда бизнес юритиш шартлари билан таништиришга тайёрлигини билдирди.
Lincoln Labs ва Truss вакиллари 2027 йил баҳорида Ўзбекистонда ўтказилиши режалаштирилган Offshore Outsourcing Tour тадбирида иштирок этишга таклиф қилинди.
