Тошкент, Ўзбекистон (UzDaily.uz) — Ўзбекистонда экспорт юкларини ташувчи транспорт воситалари устидан фитосанитария назорати кучайтирилади.
Бунга 2026 йилда хорижий мамлакатлардан Ўзбекистон маҳсулотларининг фитосанитария талабларига мувофиқ эмаслиги юзасидан келиб тушган 683 та эътироз сабаб бўлди. Бу ҳақда Ўзбекистон Ўсимликлар карантини ва ҳимояси агентлиги хабар берди.
Энг кўп эътироз Россия томонидан юборилган — 474 та. Хитойдан 198 та, Қозоғистондан эса 8 та эътироз келиб тушган.
Эътирозларнинг асосий қисми маҳсулотларда зарарли организмлар аниқлангани билан боғлиқ. Шу сабабли экспорт юкларини ташишда фойдаланиладиган транспорт воситаларининг юк бўлимлари фитосанитария ҳолатига алоҳида эътибор қаратилади.
Экспортёрлар ва ташувчилар фитосанитария қоидаларига қатъий риоя қилишга чақирилди. Бу экспорт юкларининг ушланиб қолиши, маҳсулотларнинг қайтарилиши ва хорижий мамлакатлар томонидан қўшимча чекловлар жорий этилишининг олдини олишга ёрдам беради.
