Тошкент, Ўзбекистон (UzDaily.uz) — Ўзбекистон ҳуқуқ-тартибот органлари 47 ёшли фуқаро Р.Н. ни Истанбулдан Тошкентга депортация қилди. У 12 йил давомида халқаро қидирувда бўлиб, одам савдосида айбланган. Бу ҳақда Ўзбекистоннинг Истанбулдаги Бош консулхонаси хабар бермоқда.
Тергов маълумотларига кўра, Р.Н. уюшган жиноий гуруҳ таркибида Ўзбекистон ҳудудидан ташқарида одам савдоси билан шуғулланган.
Ўзбекистон ҳуқуқ-тартибот органлари ушбу шахснинг жиноий хатти-ҳаракатларидан жабрланган барча фуқароларни Истанбулдаги Бош консулхонага, Ўзбекистон Республикаси Ички ишлар вазирлиги ёки унинг ҳудудий бўлинмаларига мурожаат қилишга чақирмоқда.
Жазонинг муқаррарлигини таъминлаш мақсадида, Ўзбекистон ҳуқуқ-тартибот идоралари турк ҳуқуқ-тартибот органлари билан ҳамкорликда махсус операцияларни давом эттириб, хорижда яширинган жиноятчиларни аниқлаш ва қўлга олиш ишларини олиб бормоқда.
