Тошкент, Ўзбекистон (UzDaily.uz) — Ўзбекистон ва Руминия техник жиҳатдан тартибга солиш соҳасида, жумладан, стандартлаштириш, метрология, сертификатлаш ва савдодаги техник тўсиқларни бартараф этиш йўналишларида ҳамкорликни кенгайтириш ниятида. Бу ҳақда Ўзбекистон Техник жиҳатдан тартибга солиш агентлиги хабар берди.
Техник жиҳатдан тартибга солиш агентлиги директори Акмал Джуманазаров Ўзбекистондаги Руминиянинг Фавқулодда ва мухтор элчиси Даниэль Кристиан Чобану билан учрашув ўтказди.
Томонлар мувофиқликни баҳолаш, бозор назорати ва маҳсулот хавфсизлигини таъминлаш соҳаларида ҳамкорлик истиқболларини кўриб чиқди. Икки томонлама савдо ривожига таъсир қилиши мумкин бўлган техник тўсиқларни бартараф этиш масалаларига алоҳида эътибор қаратилди.
Қайд этилганидек, Ўзбекистон ва Руминия ўртасидаги савдо-иқтисодий муносабатлар изчил ривожланмоқда. 2025 йил якунларига кўра, мамлакатлар ўртасидаги ўзаро савдо ҳажми 90,6 миллион АҚШ долларига етган.
Учрашув иштирокчилари техник жиҳатдан тартибга солиш соҳасида мутахассисларни тайёрлаш ва уларнинг малакасини ошириш, касбий тажриба алмашиш, замонавий лабораторияларни ривожлантириш, шунингдек, маҳсулот хавфсизлигини баҳолаш ва бозор назорати механизмларини такомиллаштириш масалаларини ҳам муҳокама қилди.
Техник талаблар ва мувофиқликни баҳолаш тизимлари соҳасидаги ҳамкорлик алоҳида йўналиш сифатида белгиланди. Учрашувда таъкидланганидек, ушбу йўналишни ривожлантириш Ўзбекистоннинг тўқимачилик ва тикув-трикотаж маҳсулотлари экспортини Европа бозорларига кенгайтириш учун муҳим аҳамиятга эга.
Музокаралар якунлари бўйича томонлар Европа техник кўмаги дастурлари доирасида янги қўшма лойиҳалар учун истиқболли йўналишларни белгилади. Шунингдек, илғор Европа тажрибасини жорий этиш ва техник жиҳатдан тартибга солиш соҳасида амалий лойиҳаларга ўтиш имконияти қайд этилди.
