Тошкент, Ўзбекистон (UzDaily.uz) — Фарғона вилоятининг Риштон туманига Россиядан 204 бош наслдор йирик шохли қорамол олиб келинди.
Ҳайвонларни импорт қилиш чорвачиликни ривожлантириш, наслчилик ишларини такомиллаштириш ва юқори маҳсулдор қорамоллар сонини кўпайтиришга қаратилган. Бу ҳақда Озиқ-овқат маҳсулотлари хавфсизлиги қўмитаси хабар берди.
Хўжаликда Фарғона вилояти Озиқ-овқат маҳсулотлари хавфсизлиги бошқармаси мутахассислари ҳайвонларни сақлаш шароитларини текширди.
Мутахассислар ветеринария ҳужжатлари, импорт қилинган қорамолларни идентификация қилиш маълумотлари ва уларнинг умумий соғлиғи ҳолатини ўрганди. Шунингдек, ҳайвонларни сақлаш ва парвариш қилиш шароитлари баҳоланди.
Олиб келинган ҳайвонлар орасида ангус, герефорд ва бошқа юқори маҳсулдор зотлар вакиллари бор. Қўмита маълумотларига кўра, уларнинг импорти қорамоллар сонини кўпайтириш, наслчилик салоҳиятини ошириш ва маҳсулдорлик кўрсаткичларини яхшилашга хизмат қилиши керак.
Текширув якунлари бўйича мутахассислар хўжаликка ҳайвонларни белгиланган ветеринария-санитария талабларига мувофиқ сақлаш бўйича тавсиялар берди. Қорамолларни тўғри озиқлантириш ва парвариш қилишга алоҳида эътибор қаратилди.
