Марказий банк июль ойида бир тонна олтин сотди
Тошкент, Ўзбекистон (UzDaily.uz) — Ўзбекистон Марказий банки 2026 йил июль ойида 1 тонна олтин сотди. Шу билан бирга, йил бошидан буён Марказий банк томонидан олтин хариди 40 тоннани ташкил этди. Бу ҳақда Жаҳон олтин кенгаши (World Gold Council) марказий банкларнинг олтин захиралари ҳақидаги ҳисоботида маълум қилди.
Кенгаш маълумотларига кўра, ҳозирда Ўзбекистоннинг умумий захираларида олтиннинг улуши 87 фоизни ташкил этади. Бу қарийб 431 тонна олтинга тенг.
Ҳисоботда қайд этилишича, мамлакат Марказий банки яқинда раис Тимур Ишметов АҚШдаги активларни бошқарувчи компаниялар вакиллари билан учрашувлар ўтказганидан сўнг эътибор марказида бўлган. Унинг сўзларига кўра, олтин ҳозирча «энг яхши инвестиция» бўлиб қолмоқда. Бироқ Марказий банк захираларни бошқаришнинг умумий стратегияси доирасида захираларнинг бир қисмини «қулай нархларда» сотиш имкониятини кўриб чиқмоқда.
Умуман, дунё марказий банклари июль ойида олтин захираларини соф ҳисобда 23 тоннага оширди. Ривожланаётган иқтисодиётлар орасида харид ҳажми бўйича Хитой 20 тонна ва Польша 8 тонна билан етакчилик қилди. Хитой Халқ банки 2026 йил май ойидан бошлаб ҳар ой икки хонали ҳажмда олтин харид қилмоқда. Йил бошидан буён у ўз захираларини 60 тоннага оширди. Бу кўрсаткич Польшадагидан кейин иккинчи энг юқори натижа ҳисобланади.
Июль ойида олтиннинг энг йирик соф сотувчиси Россия бўлди. Мамлакат 6 тонна олтин сотган. Ундан кейин Туркия, Иордания ва Ўзбекистон келади — ҳар бир давлат 1 тоннадан олтин сотган.
Йил бошидан буён марказий банкларнинг олтин харидларининг умумий ҳажми қарийб 130 тоннани ташкил этди. Ўтган йилнинг шу даврида бу кўрсаткич тахминан 160 тонна бўлган.
