Тошкент, Ўзбекистон (UzDaily.uz) — «O‘ztemiryo‘lkonteyner» АЖ АҚШнинг Аризона штатидаги Чандлер шаҳридан Қозоғистоннинг Олмаота шаҳрига махсус техника ортилган 40 футлик олтита контейнерни мультимодал ташишни ташкил этди.
Йўл қурилиши учун мўлжалланган техника ортилган контейнерлар Чандлердан Лос-Анжелес портига автомобиль транспорти орқали етказиб берилди. Шундан сўнг юк денгиз транспортида 19 кун ичида Хитойнинг Циндао портига етказилди.
Кейинги босқичда контейнерлар темирйўл транспорти орқали Қозоғистондаги Олмаота-1 станциясига жўнатилади.
Мазкур ташиш O‘ztemiryo‘lkonteyner компаниясининг халқаро логистика бозоридаги имкониятларини кенгайтириш ва «эшикдан эшиккача» тамойили асосида комплекс хизматларни ривожлантириш йўлидаги навбатдаги қадам бўлди.
