Сербия Ўзбекистон фуқаролари учун меҳнат бозорини очмоқда

Тошкент, Ўзбекистон (UzDaily.uz) — Сербия меҳнат мобиллиги ва меҳнат миграцияси тўғрисидаги янги келишув доирасида Ўзбекистон фуқароларини ишга жойлаштириш имкониятларини кенгайтиришни режалаштирмоқда.

Сербия Меҳнат, бандлик, ветеранлар ва ижтимоий масалалар вазири Милица Джурджевич Стаменковски ҳужжатни тарихий деб атаб, уни икки томонлама муносабатларни ривожлантиришдаги аҳамиятини таъкидлади.

Вазирнинг сўзларига кўра, мазкур келишув Сербия хорижий давлат билан имзолаган илк шу турдаги ҳужжат бўлди. У Белграднинг Ўзбекистон билан стратегик ҳамкорликни йўлга қўйишга интилаётганидан далолат сифатида баҳоланган.

Стаменковски келишув Сербияда ишлайдиган Ўзбекистон фуқаролари учун тизимли кафолатларни назарда тутишини таъкидлади. Хусусан, ўзбекистонлик мутахассислар сербиялик ходимлар билан бир хил ҳуқуқларга эга бўлади.

Яқин йилларда «Expo» кўргазмасининг ўтказилиши муносабати билан мамлакатда ишчи кучига бўлган қўшимча талаб юзага келиши кутилмоқда. Вазирнинг таъкидлашича, Сербияга меҳнатсевар, малакали ва виждонли мутахассислар, жумладан, Ўзбекистондан келадиган кадрлар ҳам керак бўлади.

Айни вақтда мамлакатлар эришилган келишувларни амалий жиҳатдан амалга оширишга киришмоқда. Ўзбекистон Миграция агентлиги қўшимча ходимларга эҳтиёж сезаётган сербиялик компаниялар билан бевосита музокаралар олиб бормоқда.

Ушбу ишни жадаллаштириш учун махсус ишчи гуруҳ тузилди.

Стаменковски Сербияда минимал иш ҳақи миқдорида кутилаётган ўзгаришлар ҳақида ҳам маълумот берди. Унинг сўзларига кўра, 2027 йил бошидан минимал иш ҳақи 600 еврони ташкил этиши, йил охирига келиб эса 650 еврога ошиши кутилмоқда.

Сербия вазири имзоланган келишувнинг мамлакат учун ўзига хос аҳамиятини алоҳида таъкидлади. Унинг сўзларига кўра, Ўзбекистон Сербия бундай турдаги шартномани имзолаган биринчи ва ягона давлат бўлиб қолмоқда.

Айни пайтда Сербияда бўлиб турган Ўзбекистон фуқаролари ҳақида гапирар экан, Стаменковски қонун бузилиши ҳолатлари қайд этилмаганини таъкидлади.

Унинг айтишича, Ўзбекистон фуқаролари мезбон мамлакат қадриятларига ҳурмат билан муносабатда бўлмоқда. Икки давлат халқларини эса меҳмондўстлик ва ўзаро ҳурмат бирлаштириб туради.