Қашқадарёда янги газконденсат кони очилди

Тошкент, Ўзбекистон (UzDaily.uz) — Қашқадарё вилояти Миришкор туманида янги Patron газконденсат кони очилди. Ундаги 1-сонли қидирув қудуғи газ қувурига уланиб, 2026 йил 2 сентябрда фойдаланишга топширилди. Қудуқдан дастлабки газ қазиб олиш ҳажми суткасига 500 минг куб метрни ташкил этмоқда. Бу ҳақда Ўзбекистон Энергетика вазирлиги хабар берди.

Энергетика вазирлиги, шунингдек, Қашқадарё вилояти Қарши туманида гўё газ портлаши содир бўлгани ҳақида ижтимоий тармоқларда тарқалган маълумотни рад этди. Вазирлик маълум қилишича, тарқатилаётган видеода портлаш эмас, балки янги кондаги қидирув қудуғини синаш ва фойдаланишга топшириш жараёни акс этган.

Patron участкасида биринчи қидирув қудуғини бурғилаш ишлари 2025 йилда Хитойнинг BGP компанияси томонидан 3D-сейсмик тадқиқотлар ўтказилганидан сўнг бошланган. Бурғилаш ишлари якунланган, 3296 метрдан 3339 метргача чуқурликдаги қатламларнинг маҳсулдорлигини синаш натижасида саноат миқдорида табиий газ мавжудлиги аниқланган.

Дастлабки ҳисоб-китобларга кўра, кон нисбатан кичик ҳисобланади. Унинг захиралари тахминан 2,5 млрд куб метр табиий газни ташкил этади.

Айни пайтда «O‘zLITIneftgaz» АЖ мутахассислари газодинамик ва газконденсат тадқиқотларини олиб бормоқда. Улар янги қудуқдан газ қазиб олишнинг ҳақиқий кўрсаткичларини аниқлаш учун зарур.

Энергетика вазирлиги қудуқни синаш жараёнида очиқ олов пайдо бўлиши штатдаги технологик жараён эканини алоҳида тушунтирди. Қудуқнинг маҳсулдорлиги, босими ва ишлаш параметрларини аниқлаш учун газ махсус қурилма орқали ёқиб юборилади. Шу сабабли видеода акс этган жараён, вазирлик маълумотларига кўра, портлаш ёки авариядан далолат бермайди.

Қудуқни газ қувурига улаш ва фойдаланишга топшириш ишлари 2 сентябрь куни соат 06:00 да амалга оширилган. Ишларда нефт-газ соҳасининг ҳарбийлаштирилган қисми ҳамда «O‘zLITIneftgaz» АЖ мутахассислари иштирок этган.

Энергетика вазирлиги маълумотига кўра, ишлар давомида саноат ва ёнғин хавфсизлиги, меҳнатни муҳофаза қилиш талаблари ҳамда экологик меъёрларга риоя қилинган. Зарур ташкилий ва техник чоралар Фавқулодда вазиятлар вазирлиги вакиллари назорати остида амалга оширилган.

Видео тарқалиши муносабати билан Энергетика вазирлиги ижтимоий тармоқлар администраторларини ҳолатларга ойдинлик киритмасдан туриб текширилмаган маълумотларни эълон қилмасликка чақирди. Вазирлик, шунингдек, жамоатчиликни чалғитувчи ёлғон маълумотларни тарқатиш амалдаги қонунчиликка мувофиқ жавобгарликка сабаб бўлиши мумкинлигини эслатди.

Вазирлик нефт-газ соҳасидаги воқеалар ҳақида маълумотни расмий манбалардан олишни тавсия қилди.