Тошкент, Ўзбекистон (UzDaily.uz) — Ўзбекистон таълим вазири ўринбосари Илҳом Сиражев Ашхободда Марказий Осиё мамлакатлари ва Монголия таълим вазирларининг давра суҳбати доирасида қатор икки томонлама учрашувлар ўтказди. Бу ҳақда Ўзбекистон Олий таълим, фан ва инновациялар вазирлиги хабар берди.
Илҳом Сиражев Туркманистон таълим вазири Жумамурат Гурбангелдиев, Тожикистон таълим ва фан вазири Раҳим Саидзода ҳамда Қирғизистон таълим вазири ўринбосари Надира Жусупбекова билан музокаралар олиб борди.
Учрашувларда давлат раҳбарларининг сиёсий иродаси туфайли мамлакатлар ўртасидаги дўстлик, яхши қўшничилик ва стратегик шериклик муносабатлари янги босқичга кўтарилгани таъкидланди.
Томонлар таълим соҳасидаги икки томонлама ҳамкорликни ривожлантириш, тажриба алмашиш, таълим сифатини ошириш ва қўшма ташаббусларни амалга ошириш масалаларига алоҳида эътибор қаратди.
