Тошкент, Ўзбекистон (UzDaily.uz) — АҚШ Давлат котиби Марко Рубио Вашингтон Ўзбекистон ва Марказий Осиёнинг бошқа мамлакатлари билан муносабатларни янада фаол ривожлантириш ниятида эканини маълум қилди. Унинг сўзларига кўра, сўнгги 20 йил давомида минтақа америкалик сиёсатчилар томонидан етарлича эътиборга олинмаган, бироқ ҳозир вазият ўзгармоқда. Бу ҳақда у Ўзбекистонга етиб келганидан сўнг журналистларга маълум қилди.
Рубио Ўзбекистонни минтақа учун муҳим аҳамиятга эга мамлакат деб атаб, унинг аҳоли сони, иқтисодий ўсиши ва келгусида ривожланиш салоҳиятини таъкидлади.
«Менимча, Ўзбекистон асосий рол ўйнайди, у минтақанинг таянч мамлакатидир. Бу аҳолиси энг кўп бўлган мамлакат», — деди АҚШ Давлат котиби.
У АҚШ Ўзбекистондаги ижобий иқтисодий ўсиш суръатлари сақланиб қолишидан манфаатдор эканини таъкидлади. Унинг баҳолашича, мамлакат ЯИМининг ўсиш суръати йилига 8 фоизга яқинлашмоқда.
«Агар келгуси ўн йил давомида сўнгги ўн йилликдаги каби натижаларга эриша олсангиз, Ўзбекистон ҳақиқатан ҳам ажойиб мамлакатга айланади. Ваҳоланки, у ҳозирнинг ўзида ҳам шундай», — деди Рубио.
АҚШ дипломатияси раҳбари Ўзбекистоннинг сайёҳлик салоҳиятига ҳам эътибор қаратди. Унинг сўзларига кўра, томонлар АҚШдан, эҳтимол, Майами шаҳридан Ўзбекистонга тўғридан-тўғри авиақатновни йўлга қўйиш имкониятини муҳокама қилмоқда. Шу билан бирга, АҚШнинг айрим бошқа шаҳарлари билан тўғридан-тўғри авиақатновлар аллақачон мавжуд.
Рубио Вашингтон Ўзбекистон ва Марказий Осиёнинг бошқа мамлакатларидаги ўзгаришларни қўллаб-қувватлашга интилаётганини билдирди. Унинг қайд этишича, минтақа Совет Иттифоқи парчаланганидан кейинги даврда сезиларли натижаларга эришган ва янада ривожланиш учун кенг имкониятларга эга.
«Биз айнан шунинг учун бу ердамиз. Ушбу жараёнга ижобий ҳисса қўшишни хоҳлаймиз. Шу сабабли ўзимиз билан бизнес вакилларини ҳам олиб келдик — улар ҳам мамлакат тараққиётида иштирок этишни истайди», — дея тушунтирди у.
Ташриф натижалари ва қарийб 200 та Америка компанияси вакилларидан иборат делегациянинг иштироки ҳақидаги саволга жавоб берар экан, Давлат котиби форум якунланганидан сўнг аниқ келишувлар эълон қилиниши режалаштирилаётганини маълум қилди.
«Гап бу ерда бизнес юритадиган, бу ерда уларни мамнуният билан қабул қиладиган ва Ўзбекистон бозорида ишлашдан манфаатдор бўлган компаниялар ҳақида кетмоқда. Форум якунлари бўйича ушбу келишувларни эълон қиламиз», — деди Рубио.
У кутилаётган келишувлар икки мамлакат ўртасидаги иқтисодий алоқаларни янада кенгайтиришнинг бошланиши бўлишини таъкидлади.
«Бу якуний нуқта эмас, балки бошланишдир», — дея қўшимча қилди Давлат котиби.
Минтақавий ҳамкорлик ҳақида гапирар экан, Рубио сўнгги йилларда АҚШ Марказий Осиёга кўпроқ эътибор қарата бошлаганини қайд этди. У бунга мисол сифатида ўтган йили минтақа мамлакатлари раҳбарлари ва Ўзбекистон Президенти билан ўтказилган учрашувларни келтирди. Унинг фикрича, Вашингтон АҚШ Конгресси делегацияларини минтақага тез-тез юбориб туриши керак.
Давлат котиби келажакда Марказий Осиёга яна ташриф буюришга умид билдирди. Унинг таъкидлашича, Ўзбекистонда икки томонлама музокаралар билан бир қаторда «C5+1» форматидаги учрашувнинг ўтказилиши АҚШнинг минтақа мамлакатлари билан муносабатларни мустаҳкамлашга интилаётганини кўрсатади.
