Ўзбекистонда халқаро тижорат судини ташкил этиш масаласи муҳокама қилинди
Тошкент, Ўзбекистон (UzDaily.uz) — Ўзбекистонда «Тошкент халқаро молия маркази тўғрисида»ги Конституциявий қонунни амалга ошириш доирасида Тошкент халқаро тижорат судини ташкил этиш масалалари муҳокама қилинмоқда.
4 сентябрь куни адлия вазири Акбар Тошқулов Ўзбекистон Республикаси Президентининг иқтисодий ривожланиш, самарали бошқарув ва халқаро ҳамкорлик масалалари бўйича маслаҳатчиси Сума Чакрабарти билан учрашув ўтказди. Бу ҳақда Адлия вазирлиги хабар берди.
Тошкент халқаро тижорат суди
Учрашувнинг асосий мавзуларидан бири Тошкент халқаро тижорат судини ташкил этиш бўлди. Томонлар «Тошкент халқаро молия маркази тўғрисида»ги Конституциявий қонунни амалга ошириш доирасида тегишли ҳуқуқий инфратузилмани шакллантириш масалаларини кўриб чиқди.
Музокаралар иштирокчилари, шунингдек, тижорат низоларини ҳал этиш механизмларини ривожлантириш ва халқаро молия марказининг фаолияти учун зарур бўлган ҳуқуқий муҳитни янада такомиллаштириш масалаларини муҳокама қилди.
Медиатив келишувлар ва халқаро арбитражни ривожлантириш
Учрашувда Ўзбекистонда медиация, халқаро арбитраж ва низоларни ҳал этишнинг бошқа муқобил механизмларини ривожлантиришга алоҳида эътибор қаратилди.
Томонлар, шунингдек, хорижий экспертлар билан ҳамкорликни кенгайтириш ҳамда инглиз ҳуқуқи соҳасида малакали мутахассисларни тайёрлаш имкониятларини кўриб чиқди.
Медиатив келишувлар сони тўрт баробар ошди
Учрашув давомида Ўзбекистонда медиация институти жадал ривожланаётгани қайд этилди. 2026 йилнинг биринчи ярми якунларига кўра, медиатив келишувлар сони 18 411 тага етди ва тўрт баробарга ошди.
Шу даврда суд жараёнлари доирасида 2 897 та медиатив келишув тузилди. Адлия вазирлиги маълумотларига кўра, ушбу кўрсаткичлар мамлакатда медиация институтига бўлган ишонч ортиб бораётгани ва мазкур механизмдан фойдаланишга талаб юқори эканини кўрсатади.
ТХММ доирасида ҳамкорлик
Учрашув якунида томонлар Тошкент халқаро молия маркази доирасида замонавий ҳуқуқий инфратузилмани ривожлантириш бўйича ҳамкорликни давом эттиришга келишиб олди.
Кейинги ҳамкорликнинг асосий йўналишлари халқаро низоларни ҳал этиш механизмларини шакллантириш, медиация ва арбитражни ривожлантириш, шунингдек, инглиз ҳуқуқи соҳасида фаолият юрита оладиган мутахассисларни тайёрлаш масалаларидан иборат бўлади.
