Тошкент, Ўзбекистон (UzDaily.uz) — Ўзбекистон ва Атом энергияси бўйича халқаро агентлик (АЭХА) мамлакатнинг Кафолатлар тўғрисидаги битим ва унга қўшимча протокол доирасидаги халқаро мажбуриятларини бажариш масалаларини муҳокама қилди. Бу ҳақда Саноат, радиация ва ядровий хавфсизлик қўмитасининг ахборот хизмати хабар берди.
Музокаралар АЭХА Бош конференциясининг 70-сессияси доирасида бўлиб ўтди. Саноат, радиация ва ядровий хавфсизлик қўмитаси раҳбарияти АЭХА Бош директори ўринбосари, Кафолатлар департаменти раҳбари Массимо Апаро билан учрашди.
Томонлар Ўзбекистоннинг АЭХА билан ҳамкорлигини янада мустаҳкамлаш, шунингдек, ядровий материалларни ҳисобга олиш ва назорат қилиш (ЯМҲОҚ) масалаларини кўриб чиқди.
Учрашувда ҳисобот бериш тизимини оптималлаштириш ҳамда тегишли соҳада фаолият юритаётган мутахассисларнинг малакасини ошириш масалаларига алоҳида эътибор қаратилди.
Учрашув якунлари бўйича томонлар муҳокама қилинган йўналишлар бўйича ҳамкорликни янада кенгайтиришга келишиб олди.
