Тошкент, Ўзбекистон (UzDaily.uz) — Россияда ота-она қарамоғисиз қолган яна етти нафар вояга етмаган бола Ўзбекистонга қайтарилди.
Улар орасида жазони ижро этиш муассасаларида жазо ўтаётган оналар ўзбекистонлик вакилларга топширган уч нафар бола ҳам бор.
Болаларнинг навбатдаги гуруҳи 15 сентябрь куни Ўзбекистонга етиб келди.
Уларни қайтариш ишлари Ички ишлар вазирлиги, Соғлиқни сақлаш вазирлиги ва Миллий ижтимоий ҳимоя агентлиги ходимлари томонидан болалар омбудсмани ҳамда Россиядаги Ўзбекистон консуллик муассасалари кўмагида ташкил этилди.
Ушбу гуруҳ Россиядан вояга етмаганларни репатриация қилиш бўйича хизмат сафари доирасида қайтарилган учинчи гуруҳ бўлди. Ушбу мамлакатда олиб борилган ишлар давомида жами 30 нафар бола Ўзбекистонга қайтарилди. Яна икки нафар вояга етмаган бола Қозоғистондан олиб келинди.
Болалар қайтарилганидан сўнг мутахассислар уларни кейинчалик жойлаштириш масалалари билан шуғулланмоқда. Аввало, вояга етмаганларни оилаларига қайтариш имконияти кўриб чиқилмоқда. Агар бунинг имкони бўлмаса, улар учун жойлаштиришнинг бошқа шакллари танланади.
Болаларга зарур тиббий, психологик ва ижтимоий ёрдам кўрсатилади. Уларнинг ҳолатини «Инсон» марказлари кузатиб боради.
Мутахассислар мослашув даврида болалар ва уларнинг оилаларига ҳамроҳлик қилади.
Вояга етмаганларни қайтариш бўйича ишлар давом эттирилмоқда. Айни пайтда бир нафар болани Ўзбекистонга қайтариш учун Грузияга хизмат сафари тайёрланмоқда. Туркия билан эса вояга етмаганларни репатриация қилиш масаласи бўйича музокаралар олиб борилмоқда.
