Тошкент, Ўзбекистон (UzDaily.uz) — Дубайда халқаро Arabian Travel Market (ATM 2026) туристик кўргазмаси доирасида «Ҳамкорлик орқали барқарор туристик саноатни шакллантириш» мавзусида юқори даражадаги вазирлар мулоқоти бўлиб ўтди.
Тадбирда Ўзбекистон Туризм қўмитаси раиси Абдулазиз Аккулов иштирок этди. Бу ҳақда Ўзбекистон Республикаси Туризм қўмитаси хабар берди.
Туризм соҳасини тиклаш
Мулоқотда БМТ Туризм бош котиби Шайха Ал Нувайс, Европа комиссиясининг барқарор транспорт ва туризм масалалари бўйича комиссари Апостолос Цицикостас, БАА иқтисодиёт ва туризм вазири Абдулла бин Тук Ал Маррий, Баҳрайн туризм вазири Фотима бинт Жаъфар Ал Сайрафий ҳамда бошқа юқори лавозимли вакиллар иштирок этди.
Ўзбекистоннинг тадбирдаги иштироки мураккаб ташқи шароитларда Форс кўрфази давлатларининг туризм соҳасини тиклаш бўйича тажрибасини ўрганиш, минтақада туризм ривожининг кейинги тенденцияларини баҳолаш, шунингдек, минтақадан Ўзбекистонга сайёҳлар оқимини кўпайтириш ва амалий ҳамкорликни кенгайтиришга қаратилди.
Абдулла бин Тук Ал Маррий Яқин Шарқдаги сўнгги воқеалар туризм соҳасига бевосита таъсир кўрсатганини таъкидлади. Унинг сўзларига кўра, ҳозирги шароитда сезиларли натижа ва ютуқлар ҳақида гапириш ҳали эрта.
Шу билан бирга, у туристик фаолликни тиклаш, соҳани мустаҳкамлаш ва ривожлантириш, халқаро сайёҳлар учун очиқликни кенгайтириш ҳамда юқори даражадаги хавфсизликни таъминлаш бўйича ишларни фаоллаштириш зарурлигини таъкидлади.
Ўзбекистон минтақавий туризмни илгари сурмоқда
Абдулазиз Аккулов Ўзбекистон халқаро бозорда жадал ривожланаётган истиқболли туристик йўналиш сифатида янги имкониятларни таклиф этаётганини билдирди.
Унинг таъкидлашича, президент Шавкат Мирзиёев ташаббуси билан Марказий Осиёни ягона туристик минтақа сифатида илгари суриш бўйича ишлар олиб борилмоқда. Шу муносабат билан у трансчегаравий туристик йўналишларни ривожлантириш ва барча йўналишларда ҳамкорликни фаоллаштириш зарурлигини қайд этди.
Тошкент халқаро йилнинг очилиш маросимига мезбонлик қилади
Шайха Ал Нувайс ҳамкорлик ва биргаликдаги фаолият туризм соҳасини барқарор ривожлантиришнинг асосий омилларидан бири эканини таъкидлади.
У, шунингдек, Ўзбекистоннинг «Хавфсиз туризм кодекси»ни илгари суриш борасидаги саъй-ҳаракатлари ва ташаббускорлигини қайд этиб, бу тажрибани бошқа давлатлар учун амалий намуна сифатида баҳолади.
БМТ Туризм бош котиби ўз нутқининг якунида Тошкентда «Барқарор ва ҳаётга чидамли туризм халқаро йили» деб эълон қилинган 2027 йилнинг расмий очилиш маросими бўлиб ўтишини таъкидлади. У тадбир иштирокчиларини Ўзбекистонга ташриф буюриш ва маросимда иштирок этишга таклиф қилди.
