Тошкент, Ўзбекистон (UzDaily.uz) — Ўзбекистонда «Док-1 Макс» ва «Амбронол» препаратларини истеъмол қилиш оқибатида жабрланган 88 нафар боланинг оилаларига жами 80 млрд сўм компенсация тўланди. Бу ҳақда мамлакат Соғлиқни сақлаш вазирлиги матбуот хизмати хабар берди.
Тошкент шаҳрининг жиноят ишлари бўйича суди ижро ҳужжатларига мувофиқ, Мажбурий ижро бюроси жабрланган 90 нафар боланинг оилалари фойдасига жами 82 млрд сўм компенсация ундириши керак эди.
Дастлаб 16,8 млрд сўм тўланган бўлиб, бу белгиланган сумманинг қарийб 20 фоизини ташкил этган. Айбдор шахсларнинг хатланган мол-мулкини сотиш жараёни чўзилиб кетгани сабабли, қолган маблағлар бир неча йил давомида оилаларга берилмаган.
Тўловларни тезлаштириш мақсадида Ўзбекистон Президенти жабрланган оилаларга етказилган моддий ва маънавий зарарни тўлиқ қоплашни таъминлаш бўйича топшириқ берди. Ушбу топшириқни бажариш учун давлат бюджетидан 65,2 млрд сўм ажратилди.
Жами 80 млрд сўм маблағнинг 72,2 млрд сўми вафот этган 72 нафар боланинг оилаларига берилди. Яна 7,8 млрд сўм даволанган ёки ҳозирда даволанишни давом эттираётган 16 нафар боланинг оилаларига ўтказилди.
Қолган 2 млрд сўм яна икки нафар боланинг оилаларига мўлжалланган. Соғлиқни сақлаш вазирлиги маълумотларига кўра, ушбу тўловлар банк карталари билан боғлиқ техник масалалар ҳал этилганидан кейин амалга оширилади.
Давлат бюджетидан ажратилган маблағларни айбдор шахсларнинг мол-мулкини сотишдан тушган пуллар, шунингдек, улардан ундириладиган бошқа маблағлар ҳисобидан республика бюджетига қайтариш режалаштирилган.
Шу билан бирга, Соғлиқни сақлаш вазирлиги ва бошқа давлат идоралари вакиллари республика тиббиёт марказлари шифокорлари билан биргаликда жабрланган оилалар ҳолидан хабар олмоқда. Улар болаларга қўшимча тиббий ва психологик ёрдам кўрсатиш чораларини кўрмоқда.
