Тошкент, Ўзбекистон (UzDaily.uz) — Ўзбекистон ва Туркия ўртасида Бизнесни қўллаб-қувватлаш бўйича олий даражадаги қўшма кенгашнинг биринчи йиғилиши 2026 йил 18–19 ноябрь кунлари Тошкент шаҳрида бўлиб ўтади. Бу ҳақда тадбир эълонида маълум қилинган.
Кенгаш 2026 йил октябрь ойида расман ташкил этилган. Уни тузиш тўғрисидаги келишув Ўзбекистон ва Туркия президентлари Шавкат Мирзиёев ҳамда Режеп Таййип Эрдоған томонидан 29 октябрь куни Анқарадаги музокаралар якунлари бўйича имзоланган. Бу ҳақда Ўзбекистон президенти матбуот хизмати хабар берган.
Кенгашни ташкил этишдан мақсад савдо-иқтисодий ва инвестициявий ҳамкорликни мустаҳкамлаш, икки мамлакат ишбилармон доиралари ўртасидаги алоқаларни кенгайтириш ҳамда бизнес учун қулай шароитлар яратишдан иборат.
Биринчи йиғилишда Ўзбекистон ва Туркия давлат органлари вакиллари, етакчи компаниялар, инвесторлар ҳамда ишбилармон доиралар вакиллари иштирок этади.
Дастур доирасида инфратузилма ва шаҳарсозлик, энергетика ҳамда кимё саноати масалаларига бағишланган панель сессиялари ўтказилиши режалаштирилган. Шунингдек, иштирокчилар саноат, озиқ-овқат маҳсулотларини қайта ишлаш, ижтимоий соҳа ва давлат-хусусий шериклик масалаларини муҳокама қиладилар.
Тадбир савдо ва инвестицияларни ривожлантириш имкониятларини муҳокама қилиш, саноат кооперациясини мустаҳкамлаш ҳамда қўшма лойиҳаларни илгари суриш учун шериклик алоқаларини ўрнатиш майдонига айланади.
Ташкилотчилар манфаатдор компанияларни дастурнинг барча тадбирларида, жумладан, Кенгаш йиғилиши ва мавзули панель сессияларида иштирок этишга таклиф қилди.
