Тошкент, Ўзбекистон (UzDaily.uz) — Қозоғистон президенти Қосим-Жомарт Тоқаев Ўзбекистон билан икки мамлакат божхона хизматлари ваколатхоналарини очиш тўғрисидаги келишувни ратификация қилиш ҳақидаги қонунни имзолади.
Ҳужжат божхона соҳасидаги ҳамкорлик учун ҳуқуқий ва ташкилий асосларни яратади.
Қозоғистон ва Ўзбекистон ҳукуматлари ўртасидаги келишув 2025 йил 15 ноябрь куни Тошкент шаҳрида имзоланган. Унда тезкор ахборот алмашиш, божхона иши соҳасида қўшма чора-тадбирларни келишиш ҳамда ваколатли органлар фаолиятини мувофиқлаштириш назарда тутилган.
Аввалроқ Қозоғистон Қурултойи мазкур келишувни ратификация қилиш тўғрисидаги қонунни икки ўқишда маъқуллаган эди.
Айни пайтда Ўзбекистон ва Қозоғистон давлат чегарасида 11 та ўтказиш пункти фаолият юритмоқда. Уларнинг саккизтаси автомобиль, яна учтаси темир йўл ўтказиш пунктларидан иборат.
