Тошкент, Ўзбекистон (UzDaily.uz) — Тошкент шаҳри ва Тошкент вилоятида ўтказилган экологик текширувлар натижасида 516 та объектга жами 286 млн сўм миқдорида жарима қўлланилди.
Яна учта объектнинг фаолияти тўхтатилди. Бу ҳақда Ўзбекистон Экология ва иқлим ўзгариши миллий қўмитаси хабар берди.
Жами мутахассислар 722 та объект фаолиятини ўрганди. Уларнинг 602 таси иссиқхона хўжаликлари, 56 таси саноат ва ишлаб чиқариш корхоналари, 26 таси қурилиш майдонлари ҳамда 38 таси бошқа тоифадаги объектлардан иборат.
Текширувлар давомида атмосфера ҳавосининг ифлосланиши ва чиқиндилар билан ишлаш талабларига риоя этмаслик билан боғлиқ қоидабузарликлар аниқланди.
Жумладан, айрим иссиқхона хўжаликларида кўмир тегишли фильтрларсиз ёки носоз ускуналардан фойдаланган ҳолда ёқилган. Шунингдек, ўсимлик қолдиқларини ёқиш ҳолатлари ҳам қайд этилган.
Тошкент туманидаги «E.» ва «M.I.A.» корхоналарида носоз фильтрлардан фойдаланилгани аниқланди. Фуқаро М. М.га тегишли иссиқхонада эса кўмир фильтрлаш ускунасисиз ёқилган. Ушбу иссиқхонанинг фаолияти тўхтатилди. Мирзо Улуғбек ва Сергели туманларидаги объектларга нисбатан ҳам шунга ўхшаш чоралар кўрилди.
Иссиқхона эгаларига Вазирлар Маҳкамасининг 2026 йил 22 октябрдаги 586-сон қарори талаблари тушунтирилди. Текширувлар натижасида бажарилиши мажбурий бўлган кўрсатмалар ҳам берилди.
Қурилиш майдонларига ҳам алоҳида эътибор қаратилди. Текширувлар якунлари бўйича уларга жами 9 млрд 96 млн сўм миқдорида компенсация тўловлари ҳисобланди.
«N.H.P.» қурилиш майдонида чангни бостириш ва ғилдиракларни ювиш ускуналари мавжуд эмаслиги, шунингдек, 87 289 куб метр тупроқнинг рухсатсиз жойлаштирилгани аниқланди. «B. S.» МЧЖ эса чанг ҳосил бўлишининг олдини олиш чораларини кўрмагани учун жаримага тортилди.
Экология ва иқлим ўзгариши миллий қўмитаси ҳамда ҳудудий бошқармаларнинг рейд тадбирлари кеча-кундуз узлуксиз давом этмоқда.
