Тошкент, Ўзбекистон (UzDaily.uz) — Ўзбекистон Олий Мажлиси Сенати Раиси Танзила Нарбаева Парламентлараро иттифоқнинг 153-Ассамблеяси доирасида Буюк Британия парламенти Қуйи палатаси спикери Линдси Хойл билан учрашди. Томонлар икки томонлама муносабатларни ривожлантириш ва парламентлараро алоқаларни кенгайтириш истиқболларини муҳокама қилдилар.
Музокаралар давомида икки парламентнинг соҳавий қўмиталари ва парламент гуруҳлари ўртасидаги ҳамкорликни фаоллаштиришга алоҳида эътибор қаратилди. Учрашув иштирокчилари парламентлараро мулоқотни изчил ривожлантириш муҳимлигини таъкидладилар.
Линдси Хойл Ўзбекистоннинг Буюк Британиядаги элчихонаси томонидан мамлакат мустақиллигининг 35 йиллиги муносабати билан ташкил этилган тадбирда бош меҳмон сифатида иштирок этганидан мамнунлигини билдирди.
У тадбирнинг юқори савияда ташкил этилганини эътироф этиб, бундай ташаббуслар икки давлат халқлари ўртасидаги дўстлик ва ўзаро англашувни мустаҳкамлашга хизмат қилишини таъкидлади.
Муҳокамаларнинг алоҳида мавзуси таълим соҳасидаги ҳамкорлик бўлди. Томонлар Ўзбекистон ёшларининг инглиз тилини ўрганиш ва Буюк Британияда таълим олишга бўлган қизиқиши ортиб бораётганини қайд этдилар.
Шу муносабат билан Британия университетлари ва бошқа таълим муассасалари билан ҳамкорликни кенгайтириш имкониятлари кўриб чиқилди.
Бундан ташқари, Танзила Нарбаева ва Линдси Хойл савдо-иқтисодий алоқаларни кенгайтириш, шунингдек, соғлиқни сақлаш ва хавфсизлик соҳаларидаги ҳамкорлик истиқболлари юзасидан фикр алмашдилар.
