Тошкент, Ўзбекистон (UzDaily.uz) — Текширув давомида чанг ва газни ушлаб қолувчи фильтрлар мавжуд эмаслиги, чиқарилаётган ташламалар таркибидаги айрим кимёвий кўрсаткичлар белгиланган меъёрдан ошгани ҳамда давлат экологик экспертизасининг ижобий хулосаси йўқлиги аниқланди.
Наманган шаҳрида маҳаллий аҳолининг ёқимсиз ҳиддан шикоятлари ортидан хўжалик совуни ишлаб чиқарувчи хусусий корхона фаолияти вақтинча тўхтатилди. Бу ҳақда Наманган вилояти Экология ва иқлим ўзгариши бошқармаси хабар берди.
Текширувга Наманган шаҳри Давлатобод туманидаги «Порлоқ» маҳалласи аҳолисининг мурожаати сабаб бўлди. Фуқаролар яқин атрофда жойлашган совун ишлаб чиқариш цехидан ёқимсиз ҳид тарқалаётганини маълум қилган.
Экологик полиция ходимлари вилоят Экология бошқармаси мутахассислари билан биргаликда ваколатли органни олдиндан хабардор қилган ҳолда «H.S.» хусусий корхонаси фаолиятини текширди.
Назорат тадбирлари давомида экологик талаблар бузилгани аниқланди. Жумладан, корхона замонавий чанг ва газни ушлаб қолувчи фильтрлар билан жиҳозланмаган. Бунинг оқибатида ифлослантирувчи моддалар тўсиқсиз атмосферага чиқарилган.
Бундан ташқари, лаборатория тадқиқотлари натижалари чиқарилаётган ташламалар таркибидаги айрим кимёвий кўрсаткичлар бўйича белгиланган меъёрлардан ошиш ҳолатини кўрсатди. Шунингдек, корхонада давлат экологик экспертизасининг ижобий хулосаси мавжуд эмаслиги маълум бўлди.
Аниқланган қоидабузарликлар муносабати билан ишлаб чиқариш фаолияти вақтинча тўхтатилди. Корхона фаолиятини қайта тиклашга йўл қўйилган камчиликлар тўлиқ бартараф этилганидан кейин рухсат берилади.
Экология идораси аввалроқ Тошкентда ҳам экологик талабларни бузган ҳолда кўмир ёқиш ва носоз фильтрдан фойдаланиш сабабли иссиқхона хўжалиги фаолияти тўхтатилганини эслатди.
Намангандаги мазкур ҳолат корхоналар томонидан саноат чиқиндиларини тозалаш ва экологик хавфсизликни таъминлаш бўйича талабларга риоя қилиш зарурлигини яна бир бор кўрсатмоқда.
