Миграция агентлиги ходимлари 1 млрд сўмлик талон-торожликда гумонланмоқда

Тошкент, Ўзбекистон (UzDaily.uz) — Ўзбекистон Вазирлар Маҳкамаси ҳузуридаги Миграция агентлигининг мансабдор шахслари қарийб 1 млрд сўм бюджет маблағларини талон-торож қилишда гумонланмоқда. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар қилди.

Идора маълумотларига кўра, Тошкент шаҳридаги икки нафар ходимга амалда меҳнат вазифаларини бажармаган даври учун 931,6 млн сўм иш ҳақи ҳисобланган.

Шунингдек, хабарда қайд этилишича, аввал интизомий жазо қўлланилган саккиз нафар ходимга яна 88,5 млн сўм миқдорида тўлов амалга оширилган.

Мазкур ҳолат юзасидан Ўзбекистон Республикаси Жиноят кодексининг 167-моддаси, яъни ўзлаштириш ёки растрата йўли билан талон-торож қилиш учун жавобгарликни назарда тутувчи модда бўйича жиноят иши қўзғатилди. Айни пайтда тергов ҳаракатлари олиб борилмоқда.