Тошкентда кичик бизнесга бино ва ер бепул берилади
Тошкент, Ўзбекистон (UzDaily.uz) — Ўзбекистон Президенти «Тошкент шаҳрини 2026–2027 йилларда ижтимоий-иқтисодий ривожлантириш бўйича қўшимча чора-тадбирлар тўғрисида»ги қарорни имзолади. Ҳужжат фойдаланилмаётган давлат мулкини тадбиркорлик фаолиятига жалб этишнинг янги механизмларини назарда тутади.
2026 йил 1 августдан бошлаб Тошкент шаҳри ҳокими Савдо-саноат палатаси реестрига киритилган, ишлаб чиқариш ва хизмат кўрсатиш соҳаларида фаолият юритаётган кичик бизнес субъектларини қўллаб-қувватлаш бўйича айрим қарорларни қабул қилиш ҳуқуқига эга бўлади.
Ҳужжатга мувофиқ, бундай тадбиркорларга бўш турган давлат бинолари ва иншоотлари 10 йилгача бўлган муддатга бепул фойдаланишга берилиши мумкин. Бунда объектларни таъмирлаш ва жиҳозлаш тадбиркорларнинг ўз маблағлари ҳисобидан амалга оширилиши мажбурий шарт ҳисобланади.
Бундан ташқари, кичик бизнес субъектлари майдони 1,5 минг квадрат метргача бўлган бўш ер участкаларида инвестиция лойиҳаларини амалга оширишлари мумкин бўлади.
Қурилиш ишлари якунланиб, барпо этилган объект давлатга топширилганидан сўнг ер участкаси тадбиркорга 15 йилгача бўлган муддатга бепул фойдаланиш учун берилиши мумкин.
Қарорда таъкидланишича, янги чоралар фойдаланилмаётган давлат мулкини иқтисодий айланмага жалб қилиш, кичик бизнесни қўллаб-қувватлаш, шунингдек, пойтахтда ишлаб чиқариш ва хизмат кўрсатиш фаолиятини кенгайтиришга қаратилган.
