ЕТТБ Тошкент қувур заводига 25 млн доллар ажратади

Тошкент, Ўзбекистон (UzDaily.uz) — Европа тикланиш ва тараққиёт банки (ЕТТБ) мамлакатдаги етакчи хусусий металл конструкциялари ишлаб чиқарувчиларидан бири бўлган Тошкент қувур заводига энергия самарадорлигини ошириш ва ишлаб чиқариш қувватларини модернизация қилиш дастурини амалга ошириш учун 25 миллион АҚШ долларигача миқдорда кредит ажратади.

Молиялаштириш узун ўлчамли пўлат маҳсулотлари, жумладан симкатанка ишлаб чиқаришда фойдаланиладиган чўзиш стани ускуналарини алмаштириш ва модернизация қилишга йўналтирилади. Шунингдек, корхона қувурларни ташқи изоляция қилиш цехида энергия тежамкор ускуналарни ўрнатади. Улар қаторида металлни тоблаш, болғалаш ва зич ўрнатиш жараёнлари учун мўлжалланган ўрта частотали индукцион қиздириш тизими ҳам бор.

Лойиҳанинг амалга оширилиши узун ўлчамли пўлат маҳсулотлари ишлаб чиқаришни модернизация қилиш ва катта диаметрли изоляцияланган қувурлар ишлаб чиқариш ҳажмини кенгайтириш имконини беради. Янги технологияларни жорий этиш натижасида табиий газ истеъмолини йилига 22 фоизга, электр энергияси сарфини эса 35 фоизгача қисқартириш кутилмоқда.

ЕТТБ маълумотига кўра, мазкур лойиҳа корхонанинг рақобатбардошлигини оширишга хизмат қилади ҳамда қурилиш ва инфратузилма соҳалари томонидан пўлат маҳсулотларига бўлган ўсиб бораётган талабни самарали қондириш имконини яратади.

Лойиҳа Япония ва ЕТТБ ҳамкорлик жамғармаси, шунингдек, ЕТТБнинг Иқлим ўзгариши соҳасида молия ва технологиялар трансфери маркази (FINTECC) кўмагида амалга оширилмоқда. Ташаббус банкнинг энергия самарадор технологияларга инвестицияларни қўллаб-қувватлаш орқали «яшил» иқтисодиётга ўтишни рағбатлантириш стратегиясига мос келади.

ЕТТБ маълумотларига кўра, банкнинг Ўзбекистон иқтисодиётига киритган умумий инвестициялари ҳажми 210 та лойиҳа доирасида қарийб 6,9 миллиард АҚШ долларига етган. Маблағларнинг асосий қисми хусусий секторни ривожлантиришга йўналтирилган.

Сўнгги олти йил давомида Ўзбекистон Марказий Осиёда ЕТТБ молиялаштиришининг энг йирик олувчиси бўлиб қолмоқда.