Ўзбекистон ва Туркия фармацевтика лойиҳаларини муҳокама қилишди
Тошкент, Ўзбекистон (UzDaily.uz) — Ўзбекистон Савдо-саноат палатаси раиси ўринбосари Бахром Махматраемов ҳамда раис маслаҳатчиси Алишер Шайхов Туркиянинг фармацевтика соҳасидаги етакчи компанияларидан бири — Kiperin İlaç Gıda Sanayi ve Ticaret Limited Şirketi раҳбари Толга Пекташ бошчилигидаги делегация билан учрашув ўтказди.
Kiperin İlaç Gıda Sanayi ve Ticaret Limited Şirketi 2019 йилда ташкил этилган бўлиб, озиқ-овқат қўшимчалари, коллаген, витаминлар ва саломатлик учун мўлжалланган маҳсулотларни ишлаб чиқариш ҳамда уларни халқаро бозорларга экспорт қилишга ихтисослашган. Компания маҳсулотлари GMP, HACCP, ISO ва Halal каби халқаро стандартлар асосида ишлаб чиқарилиб, қатор давлатларга экспорт қилинади.
Учрашув давомида Ўзбекистон ва Туркия ўртасидаги савдо-иқтисодий алоқаларни янада мустаҳкамлаш, фармацевтика саноатида қўшма лойиҳаларни амалга ошириш, инвестициявий ҳамкорликни ривожлантириш, экспорт-импорт операциялари ҳажмини ошириш ҳамда икки мамлакат ишбилармон доиралари ўртасида тўғридан-тўғри алоқаларни кенгайтириш масалалари муҳокама қилинди.
Шунингдек, туркиялик делегацияга Ўзбекистонда инвесторлар учун яратилган қулай бизнес муҳити, ишлаб чиқаришни маҳаллийлаштириш имкониятлари, давлат томонидан кўрсатилаётган қўллаб-қувватлаш механизмлари, солиқ ва божхона имтиёзлари, шунингдек, экспорт-импорт фаолиятини ташкил этиш тартиблари ҳақида атрофлича маълумот тақдим этилди.
Учрашув якунида томонлар фармацевтика соҳасидаги ҳамкорликни амалий лойиҳалар орқали кенгайтириш, инвестиция ва технологиялар трансферини рағбатлантириш, шунингдек, икки мамлакат ишбилармон доиралари ўртасидаги шериклик алоқаларини янада фаоллаштириш бўйича ҳамкорликни давом эттиришга келишиб олдилар.
