Тошкент, Ўзбекистон (UzDaily.uz) — Наманган вилояти делегацияси Корея Республикасига ташрифи давомида чорвачилик ва паррандачилик соҳаларида янги инвестиция лойиҳаларини амалга ошириш бўйича келишувларга эришди. Бу ҳақда Наманган вилояти матбуот хизмати хабар берди.
Вилоят вакиллари Хонсон шаҳрида йирик агросаноат мажмуаларининг фаолияти билан танишиб, хорижий ҳамкорлар томонидан ишлаб чиқаришни ташкил этишда қўлланилаётган технологияларни ўрганди.
Хусусан, «Seongcheong Farm» корхонасида делегацияга паррандачилик ва сутни қайта ишлашда қўлланилаётган замонавий технологиялар, шунингдек, узлуксиз ишлаб чиқариш циклини ташкил этиш жараёнлари намойиш этилди.
«BAEKGWANG FOOD» чорвачилик мажмуасида эса Наманган вилояти вакиллари қишлоқ хўжалиги ҳайвонларини сақлаш тизими, сифатли озуқа тайёрлаш ва маҳсулдорликни ошириш усуллари билан танишди.
Музокаралар якунлари бўйича Корея компаниялари тажрибасидан фойдаланган ҳолда Наманган вилоятида чорвачилик ҳамда парранда учун озуқа ишлаб чиқаришга ихтисослашган замонавий корхонани ишга тушириш бўйича келишувга эришилди.
Кейинги босқичда кореялик инвесторлар ва мутахассисларнинг Наманган вилоятига ташрифи режалаштирилган. Улар маҳаллий бозор ҳолати, хомашё базаси ва ҳудуднинг логистика имкониятларини ўрганади. Шундан сўнг томонлар қўшма лойиҳани амалий татбиқ этиш бўйича кейинги чора-тадбирларни белгилаб олади.
Кутилишича, лойиҳанинг амалга оширилиши вилоятнинг озуқа базасини мустаҳкамлаш ва чорвачилик маҳсулотлари ишлаб чиқариш ҳажмини ошириш имконини беради.
