Тошкент, Ўзбекистон (UzDaily.uz) — Ўзбекистон Республикаси Давлат активларини бошқариш агентлиги (ДAБА) 2026 йил охиригача мобиль оператор Mobiuz (UMS)нинг 100 фоиз акцияларини хусусийлаштириш жараёнини якунлашни режалаштирмоқда. Бу ҳақда агентлик директорининг ўринбосари Алишер Миралиев Cbonds томонидан ўтказилган «Ўзбекистон Республикаси капитал бозори» VIII халқаро конференцияси доирасида Spot нашрига берган интервьюсида маълум қилди.
Июнь ойида Mobiuz бўйича ўтказилган савдоларда ғолиб чиққан АҚШнинг McKim and Company компанияси бошчилигидаги инвесторлар консорциуми операторни хусусийлаштириш бўйича меморандумни имзолаган эди. Айни пайтда томонлар шартнома шартларини келишмоқда. Битим нархи бўйича эса аллақачон келишувга эришилган.
Консорциум Mobiuzнинг 100 фоиз акциялари учун 351 млн доллар тўлаши, шунингдек, телекоммуникация инфратузилмасини модернизация қилиш ва тармоқни ривожлантиришга қўшимча 500 млн доллар инвестиция киритиши керак. Шу тариқа, инвестиция мажбуриятларини ҳам ҳисобга олганда, битимнинг умумий қиймати 851 млн долларни ташкил этади.
«Ҳа, бугунги кунга келиб келишув имзоланган. Энди шартнома шартлари бўйича музокаралар олиб борилмоқда. Нарх бўйича келишувга эришилди», — деди Миралиев.
Унинг сўзларига кўра, музокараларни якунлаш ва шартномани жорий йил охиригача имзолаш режалаштирилмоқда. Шартнома тузилиб, дастлабки тўловлар амалга оширилганидан сўнг Mobiuzни бошқариш инвесторга ўтказилади.
Миралиев, шунингдек, қонунчилик инвестор томонидан тўлов мажбуриятлари бажарилишига қараб компаниядаги улушнинг муайян қисмини босқичма-босқич ўтказиш имконини беришини таъкидлади.
