Тошкент, Ўзбекистон (UzDaily.uz) — BMB HOLDING Хитойнинг China Construction Second Engineering Bureau Co., Ltd. қурилиш компанияси билан Ўзбекистонда инвестициявий ҳамкорликни ривожлантириш ва туристик инфратузилмани кенгайтириш истиқболларини муҳокама қилди.
Учрашувда BMB HOLDING департаменти директори Бобир Яҳяев, маркетинг бўйича директор Чжао Пу ва бизнес-менежер Ван Аоцзян иштирок этди.
Хитой компанияси Хитойнинг энг йирик қурилиш корпорацияларидан бири бўлган China State Construction Engineering Corporation таркибига киради.
Томонлар Ўзбекистоннинг туристик салоҳиятидан фойдаланиш, замонавий инфратузилмани барпо этиш ва янги қурилиш технологияларини қўллаган ҳолда инвестиция лойиҳаларини амалга ошириш имкониятларини кўриб чиқди.
Хитой компанияси вакиллари капсула уйлар ва модулли бинолар қуриш бўйича ечимларни тақдим этди. Уларнинг баҳолашича, бундай технологиялар туристик ҳудудларда меҳмонхоналар, дам олиш масканлари, кафе, ресторанлар ва савдо объектларини қисқа муддатларда барпо этиш имконини беради.
Шунингдек, қурилиш муддатларини қисқартириш ва ресурслардан янада оқилона фойдаланиш имкониятлари муҳокама қилинди.
Учрашув иштирокчилари мазкур ечимларни Ўзбекистон шароити ва маҳаллий бозор эҳтиёжларига мослаштириш юзасидан фикр алмашди.
Бундан ташқари, туристик ҳудудларда комплекс инфратузилма объектларини қуриш ва ушбу соҳага инвестициялар жалб этиш истиқболлари кўриб чиқилди.
BMB HOLDING делегациясининг Хитойга режалаштирилган ташрифи доирасида China Construction Second Engineering Bureau компаниясининг ишлаб чиқариш ва лойиҳалаш фаолияти билан танишиш бўйича келишувга эришилди.
Ташриф дастуридан компания раҳбарияти билан учрашув ва музокаралар ўтказиш, шунингдек, инвестициявий ҳамкорлик ва қўшма лойиҳаларнинг истиқболли йўналишларини муҳокама қилиш ҳам ўрин олган.
Музокаралар якунларига кўра, томонлар тақдим этилган таклифларни ўрганишни давом эттириш, уларнинг техник-иқтисодий асосларини баҳолаш ва лойиҳаларни Ўзбекистонда амалга ошириш имкониятларини кўриб чиқишга келишиб олди.
