Тошкент, Ўзбекистон (UzDaily.uz) — Ўзбекистондан кабель ва сим маҳсулотлари импортига нисбатан антидемпинг текшируви ҳеч қандай чеклов чораларисиз якунланди. Украина Халқаро савдо бўйича идоралараро комиссияси Ўзбекистонда ишлаб чиқарилган кабель-ўтказгич маҳсулотларига нисбатан антидемпинг текширувини чеклов чораларини жорий этмасдан тўхтатди. Бу ҳақда тақдим этилган хабарда маълум қилинган.
Комиссия ушбу қарорни 2026 йил 3 ноябрь куни қабул қилди. Текширув 2025 йил май ойида бошланган бўлиб, Ўзбекистон, Озарбайжон ва Туркияда ишлаб чиқарилган маҳсулотларни қамраб олган.
Текширув жараёнида демпинг маржаси 31,5 фоиз даражасида экани аниқланган. Бироқ текширув якунларига кўра, антидемпинг божларини жорий этишга қарор қилинмаган.
Хабарда эришилган натижа Ўзбекистон Инвестициялар, саноат ва савдо вазирлигининг саъй-ҳаракатлари ҳамда Украина томони билан олиб борилган ҳамкорлик билан боғланган.
Қабул қилинган қарор ўзбекистонлик ишлаб чиқарувчиларга Украина бозорига қўшимча чекловларсиз кириш имкониятини сақлаб қолишга хизмат қилади.
Инвестициялар, саноат ва савдо вазирлиги хорижий бозорларда маҳаллий ишлаб чиқарувчилар ва экспортёрлар манфаатларини ҳимоя қилиш бўйича ишларни давом эттиради.
