Тошкент, Ўзбекистон (UzDaily.uz) — «Ўзметкомбинат» АҚШ ва Австралия компаниялари мутахассислари билан Тебинбулоқ металлургия конини ўзлаштириш лойиҳаси бўйича музокаралар ўтказди. Бу ҳақда «Ўзметкомбинат» хабар берди.
Томонлар лойиҳани амалга ошириш истиқболлари, коннинг саноат салоҳияти ҳамда унинг техник-иқтисодий жиҳатларини кўриб чиқди.
Конни ўзлаштириш жараёнига халқаро тажрибани жалб қилиш имкониятларига алоҳида эътибор қаратилди.
Учрашув иштирокчилари, шунингдек, лойиҳанинг кейинги босқичлари ва келгусидаги ҳамкорликнинг эҳтимолий йўналишлари юзасидан фикр алмашди.
«Ўзметкомбинат»да хорижий мутахассислар билан ҳамкорлик Тебинбулоқ конининг салоҳияти ва уни ўзлаштириш истиқболларини янада чуқурроқ ўрганиш имконини беришини таъкидлашди.
Лойиҳа корхонанинг хомашё мустақиллигини таъминлаш йўлидаги муҳим қадамлардан бири сифатида ҳам кўриб чиқилмоқда.
Кутилишича, лойиҳанинг амалга оширилиши маҳаллий темир рудаси базасини шакллантириш, импортга қарамликни камайтириш ва Ўзбекистон металлургия саноатининг ишлаб чиқариш имкониятларини кенгайтиришга хизмат қилади.
