22 апрелдан бошлаб банк иловалари фойдаланувчи номидаги телефон рақамини талаб қилади

Тошкент, Ўзбекистон (UzDaily.uz) — Ўзбекистон Республикаси Марказий банки жисмоний шахсларга молиявий хизматларни масофадан туриб кўрсатишда ахборот хавфсизлиги, киберҳимоя ва фирибгарликнинг олдини олиш бўйича янги талабларни тасдиқлади.

Минимал талаблар тўғрисидаги низомга мувофиқ, 2026 йил 22 апрелдан бошлаб банклар ва тўлов тизимларининг мобил иловаларидан фойдаланиш учун фойдаланувчи номига расмийлаштирилган ҳамда ЖШШР (ПИНФЛ)га мос келадиган телефон рақамидан фойдаланиш мажбурий бўлади.

Агар телефон рақами билан ЖШШР ўртасидаги мувофиқлик тасдиқланмаса, иловада рўйхатдан ўтиш ёки банк картасини боғлаш имкони бўлмайди. Фойдаланувчиларга тасдиқлаш зарурати ҳақида SMS-хабар орқали маълум қилинади.

Шу тариқа, агар мобил илова ёки банк картасига уланган телефон рақами бошқа шахс номига расмийлаштирилган бўлса, 22 апрелдан кейин ушбу рақам орқали иловадан фойдаланиш чекланади. Марказий банк фойдаланувчиларга олдиндан рақамни ўз номига расмийлаштириш ёки карталар ва иловаларни шахсий рақамга қайта боғлашни тавсия қилади.

Ушбу янгилик масофавий молиявий операцияларда киберхавфсизлик даражасини ошириш ва мижозларни фирибгарлик ҳаракатларидан ҳимоя қилишга қаратилган.