YXHT va xalqaro hamkorlar Toshkentdagi konferensiyada Markaziy Osiyoning kelajakdagi rivojlanishini muhokama qildi

Toshkent, O‘zbekiston (UzDaily.uz) — Toshkent shahrida Jahon iqtisodiyoti va diplomatiya universiteti huzuridagi Diplomatik akademiya hamda YXHTning O‘zbekistondagi loyihalar koordinatori hamkorligida “Markaziy Osiyo: mintaqaviy rivojlanishning yangi paradigmasi” mavzusidagi xalqaro konferensiya bo‘lib o‘tdi.

Konferensiyada Markaziy Osiyo davlatlari va Ozarbayjon diplomatik akademiyalari vakillari, diplomatik missiyalar, BMTning Markaziy Osiyo uchun preventiv diplomatiya bo‘yicha mintaqaviy markazi (Ashxobod), shuningdek, xalqaro va ilmiy tashkilotlar ekspertlari, jumladan, Finlandiya xalqaro munosabatlar instituti (FIIA) vakillari ishtirok etdi.

Ishtirokchilar Markaziy Osiyoda siyosiy ishonch va yaxshi qo‘shnichilik muhiti mustahkamlanib borayotgani, shuningdek, iqtisodiy, transport, energetika va gumanitar aloqalarni rivojlantirishda mintaqaviy hamkorlikning o‘rni ortib borayotganini ta’kidladilar.

Konferensiya davomida mintaqaviy muloqotni izchil rivojlantirish, ekspert va akademik almashinuvlarni kengaytirish muhimligi qayd etildi. Shu nuqtai nazardan, Markaziy Osiyo Ekspert forumi (Toshkent, 2025) hamda Farg‘ona tinchlik forumi mintaqada ishonchni mustahkamlash va amaliy hamkorlikni rivojlantirishga xizmat qilayotgan muhim platformalar sifatida e’tirof etildi.

Muhokamalar davomida mintaqaviy xavfsizlik, iqlim va suv bilan bog‘liq muammolar, transport bog‘liqligi hamda iqtisodiy hamkorlik masalalariga alohida e’tibor qaratildi. Ishtirokchilar transchegaraviy tahdid va muammolar muvofiqlashtirilgan hamda uzoq muddatli yechimlarni talab qilishini qayd etdilar.

Konferensiya yakunida akademik, ekspert va diplomatik hamjamiyatlar o‘rtasidagi hamkorlikni yanada mustahkamlash, shuningdek, barqarorlik, o‘zaro ishonch va barqaror rivojlanish manfaatlari yo‘lida mintaqaviy muloqotni davom ettirish muhimligi ta’kidlandi.

Tadbir mintaqa rivojlanishining “yangi paradigmasi” shakllanayotganining yana bir tasdig‘i bo‘ldi - ya’ni faol mintaqaviy hamkorlikdan chuqur intellektual va institutsional integratsiyaga o‘tish jarayonini namoyon etdi.