Toshkent hokimligi Glinka ko‘chasidagi avariyaning dastlabki sababini maʼlum qildi

Toshkent, O’zbekiston (UzDaily.uz) — Toshkent hokimligi Glinka ko‘chasida yuzaga kelgan avariyaviy holatning dastlabki sababini maʼlum qildi. Dastlabki maʼlumotlarga ko‘ra, diametri 219 mm bo‘lgan yer osti gaz quvuridan sizib chiqqan gaz issiqlik tarmoqlari kamerasida to‘plangan va bu hodisaga sabab bo‘lgan.

Tekshiruvlar davomida gaz quvurining taxminan 375 kv. sm maydonli qismida sizib chiqishning bir nechta nuqtasi aniqlangan. Shikastlangan uchastka o‘lchami 15×25 sm ni tashkil etgan.

Ayni paytda soha mutaxassislari gaz sizishining sabablari va hodisaning barcha holatlarini o‘rganishda davom etmoqda. Hokimlikda taʼkidlanishicha, nafaqat avariya oqibatlarini bartaraf etish, balki bunday holatlar takrorlanishining oldini olish maqsadida muhandislik tarmoqlarining holatini ham tekshirish muhim.

Tekshiruv ishlari yakunlanganidan so‘ng yo‘l qoplamasini tiklash ishlari davom ettiriladi. Yaqin vaqt ichida yo‘lning mazkur qismi transport harakati uchun qayta ochilishi kutilmoqda.

Hodisa yuzasidan jinoyat ishi qo‘zg‘atilgan va tergov harakatlari olib borilmoqda. Tergov natijalariga ko‘ra, aybdor shaxslarning harakatlariga huquqiy baho beriladi.

Toshkent hokimligi maʼlum qilishicha, vaziyat shahar hokimiyati tomonidan doimiy nazoratda qolmoqda.