O‘zbekiston va Toskana kelishuvlarni amalga oshirmoqda

Toshkent, O’zbekiston (UzDaily.uz) — O‘zbekiston va Italiyaning Toskana hududi O‘zbekiston Prezidenti Shavkat Mirziyoyevning mintaqa gubernatori Eudjenio Jani bilan uchrashuvi yakunlari bo‘yicha erishilgan kelishuvlarni amaliy jihatdan ro‘yobga chiqarishga kirishdi. Bu haqda Migratsiya agentligi xabar qildi.

Migratsiya agentligi direktori Behzod Musayev Toskana gubernatori Eudjenio Jani bilan muzokaralar o‘tkazdi. Tomonlar davlat rahbarining 14 iyul kuni bo‘lib o‘tgan uchrashuv yakunlari bo‘yicha bergan topshiriqlarini bajarish, shuningdek erishilgan kelishuvlarni amalga oshirish mexanizmlarini muhokama qildi.

«Tarix shuni ko‘rsatadiki, xalqlar o‘zaro hamkorlik qilib, bir-biridan o‘rganganida taraqqiyotga erishgan», — dedi Toskana gubernatori Eudjenio Jani.

Muzokaralarning asosiy mavzularidan biri o‘zbekistonlik shifokorlar va hamshiralarni Toskana tibbiyot muassasalariga yuqori maoshli ish o‘rinlari bilan taʼminlagan holda ishga joylashtirish masalasi bo‘ldi.

Tashrif doirasida O‘zbekiston delegatsiyasi Piza universiteti rektori Rikkardo Sukki bilan ham uchrashdi. Muzokaralar yakunlari bo‘yicha O‘zbekistondan nomzodlarni Italiyadagi tibbiy standartlarga muvofiq ishlashga tayyorlash, shuningdek italyan tilini o‘rgatishni nazarda tutuvchi qo‘shma taʼlim dasturini ishlab chiqish to‘g‘risida kelishuv imzolandi.

Bundan tashqari, O‘zbekiston delegatsiyasi vakillari Piza universitetining yangi klinikasi qurilishi bilan tanishdi. Kelgusida ushbu klinikada O‘zbekistondan mutaxassislarni ishga joylashtirish rejalashtirilmoqda.

Tomonlar, shuningdek, universitet klinikasi bazasida tibbiyot kadrlarini amaliy tayyorlash imkoniyatlarini ham muhokama qildi.