Toshkent, O’zbekiston (UzDaily.uz) — O‘zbekiston Pkasblar va kompetensiyalar mintaqaviy atlasini ishlab chiqishni taklif qildi.
Davlat rahbari bu tashabbusni Avozada Markaziy Osiyo davlatlari rahbarlarining Maslahat uchrashuvida ilgari surdi. Bu haqda O‘zbekiston Respublikasi Prezidenti matbuot xizmati xabar berdi.
Taʼkidlanishicha, atlas mintaqa davlatlarida mutaxassislar taqchilligi allaqachon kuzatilayotgan yoki yaqin yillarda kadrlarga bo‘lgan talab ortishi kutilayotgan yo‘nalishlar bo‘yicha prognozlarni birlashtiradi.
Mirziyoyev inson kapitali Markaziy Osiyoning kelajagi uchun asosiy masalalardan biri ekanini taʼkidladi.
Uning so‘zlariga ko‘ra, mintaqa katta demografik salohiyatga ega: aholi soni o‘sib bormoqda, yoshlar ulushi esa ortib bormoqda.
Prezident taʼkidlaganidek, yoshlarning taʼlim sifati va kasbiy tayyorgarligi ko‘p jihatdan yaqin o‘n yilliklarda mintaqa iqtisodiyotining rivojlanishini belgilab beradi.
«Shuning uchun taʼlim va yoshlarni qo‘llab-quvvatlash hamkorligimizda alohida o‘rin egallashi kerak», — dedi Mirziyoyev.
Uning fikricha, kelgusida Markaziy Osiyo davlatlari bir vaqtning o‘zida mintaqaning bir nechta mamlakatlarida amalga oshiriladigan yirik loyihalarning ehtiyojlarini hisobga olgan holda mutaxassislar tayyorlashi mumkin.
Bu taʼlim tizimini sanoat, transport, energetika, raqamli texnologiyalar va boshqa sohalarni rivojlantirish bilan yana-da chambarchas bog‘lash imkonini beradi.
Prezident kadrlar tayyorlash mavzusiga texnologik rivojlanish nuqtai nazaridan ham to‘xtaldi. O‘zbekiston sohaviy mutaxassislarni tayyorlash bo‘yicha qo‘shma dasturlarni yo‘lga qo‘yish, ilmiy loyihalarni qo‘llab-quvvatlash va texnologik tadbirkorlik uchun imkoniyatlarni kengaytirishni taklif qildi.
Mirziyoyev raqamli iqtisodiyotni rivojlantirish uchun malakali mutaxassislar, ilmiy tadqiqotlar va kuchli texnologik kompaniyalar zarurligini taʼkidladi.
Nutqining yakunida davlat rahbari kelajak avlodlar munosib hayot kechirish, ishlash, taʼlim olish va farzand tarbiyalash uchun imkoniyatlar mavjud bo‘lgan mintaqani qabul qilib olishlari kerakligini taʼkidladi.
Avozadagi Maslahat uchrashuvi ilk bor Ozarbayjon ishtirokida o‘tkazildi.
