Fargʻona viloyati va Xenan ilmiy hamkorlikni mustahkamlaydi

Toshkent, O’zbekiston (UzDaily.uz) — Farg‘ona viloyati hokimining birinchi o‘rinbosari Mirzohid Ubaydullayev Xitoyning Xenan Fanlar akademiyasi bosh muhandisi Goa Yan boshchiligidagi delegatsiyani qabul qildi.

Uchrashuvda Farg‘ona viloyati bilan Xenan Fanlar akademiyasi o‘rtasida ilmiy-innovatsion hamkorlikni yo‘lga qo‘yish, qo‘shma ilmiy platformani tashkil etish, yuqori malakali mutaxassislar tayyorlash hamda qishloq xo‘jaligi sohasida innovatsion loyihalarni amalga oshirish masalalari muhokama qilindi.

Qishloq xo‘jaligida raqamli texnologiyalarni keng joriy etish, jumladan, aqlli sug‘orish tizimlarini tatbiq etish, sunʼiy intellekt imkoniyatlaridan samarali foydalanish, mineral tahlil laboratoriyasini tashkil etish bo‘yicha takliflar bildirildi.

Shuningdek, chorvachilik va parrandachilik tarmoqlarini ilmiy yondashuvlar asosida rivojlantirish yuzasidan fikr almashildi.

Uchrashuvda Farg‘ona viloyatida investorlar uchun yaratilgan qulay ishbilarmonlik va investitsiya muhiti alohida qayd etilib, ilgari surilgan loyihalarni Xitoyning ilg‘or tajribasi asosida amalga oshirish mexanizmlari muhokama qilindi.

Muloqotda o‘zaro manfaatli yo‘nalishlarda hamkorlikni kengaytirish, qo‘shma loyihalarni amalga oshirish va tashabbuslar doirasida aniq chora-tadbirlar rejasini ishlab chiqish bo‘yicha kelishib olindi.