Зангиота туманида энергия сақлаш тизими ишга туширилди

Тошкент, Ўзбекистон (UzDaily.uz) — 4 сентябрь куни Тошкент вилоятининг Зангиота туманида қуввати 175 МВт ва сиғими 350 МВт·соат бўлган энергия сақлаш тизими электр тармоғига уланди. Қиймати 85 млн долларлик лойиҳа хорижий инвестициялар ҳисобидан амалга оширилди. Бу ҳақда Ўзбекистон Энергетика вазирлиги хабар берди.

Уланиш куни объектга энергетика вазири Шерзод Хўжаев ташриф буюрди. У энергия сақлаш тизимини ишга тушириш ва уни электр тармоғига улаш жараёни билан танишди.

Айни вақтда тизим электр тармоғига уланган. Объектни тўлиқ қувватда ишга тушириш сентябрь ойи охирига қадар режалаштирилган.

Янги тизим электр тармоғининг юқори юклама даврларида барқарор ишлашини таъминлашга мўлжалланган. Жамғарилган электр энергиясидан суткасига икки марта, ҳар сафар икки соат давомида фойдаланиш мумкин бўлади.

Тизимнинг қуввати 175 МВтни, сиғими эса 350 МВт·соатни ташкил этади.

Энергетика вазирлиги маълумотларига кўра, талаб юқори бўлган соатларда жамғарилган энергиядан фойдаланиш электр тармоғи ишини барқарорлаштириш имконини беради.