Тошкент, Ўзбекистон (UzDaily.uz) — «Zamin» фонди Васийлик кенгаши раиси Жаҳон болалар фаровонлиги саммити — «Болалар фаровонлигига инвестициялар: келажак авлодлар учун барқарор ва адолатли тараққиёт йўли» иштирокчилари билан биргаликда марказий мавзуси бола бўлган кўргазмага ташриф буюрди.
Экспозиция боланинг ҳаёт йўлини намойиш этди. Бу йўл ҳали бола туғилмасидан, бўлажак онага ғамхўрлик қилишдан бошланади.
Кейинги босқичлар хавфсиз туғруқ, боланинг илк қадамлари, боғча, мактаб ва ижтимоий муҳитга мослашиш даврини қамраб олади. Бу жараён касб танлаш ва меҳнат фаолиятини бошлаш билан якунланади.
Ташриф буюрувчилар боланинг асосий эҳтиёжлари ортида давлат ва жамиятнинг доимий масъулияти туришини кўрдилар. Ташкилотчилар бундай эҳтиёжлар қаторига хавфсизлик ҳисси, яқинлар меҳри, таълим олиш, мулоқот қилиш ва ўз келажагини танлаш имкониятини киритди.
Шунингдек, соғлиқни сақлаш, ижтимоий ҳимоя ва таълим соҳаларидаги қонунлар ҳамда ислоҳотлар болалар учун янги имкониятлар эшигини очиши кераклигига алоҳида эътибор қаратилди.
Кўргазма билан танишув якунида меҳмонлар катта қоғоз қайиқча олдига келиб, унга ўз тилакларини ёзиб қолдирдилар.
Қайиқча биргаликдаги умидларнинг сафарга отланишини ифодалайди.
