Тошкент, Ўзбекистон (UzDaily.uz) — Япония Ўзбекистон фуқаросини депортация қилдиЯпония Иммиграция хизматлари агентлиги мамлакатда ноқонуний бўлиб турган Ўзбекистон фуқаросини давлат бюджети ҳисобидан ўз ватанига депортация қилди.
У талабалик визаси билан Японияга кирган ва виза муддати тугаганидан кейин ҳам мамлакатда қолган. Шундан сўнг у маҳаллий ҳокимият органлари томонидан қўлга олинган. Бу ҳақда Япониянинг Ўзбекистондаги элчихонаси хабар берди.
Элчихона Японияда ноқонуний бўлиш ёки ишлаш учун қатъий чоралар қўлланилишидан огоҳлантирди. Бундай ҳолатларда полиция томонидан ҳибсга олиш, иммиграция муассасасига жойлаштириш ва депортация қилиш чоралари кўрилади.
Бундан ташқари, Япония ҳукумати қоидабузарлар ҳақидаги маълумотларни Ўзбекистон ҳукуматига тақдим этади. Шу сабабли уларга нисбатан чоралар ватанига қайтганидан кейин ҳам кўрилиши мумкин. Дипломатик ваколатхона фуқароларни «Японияда ишлаш мумкин» каби таклифларга ишонмасликка чақирди.
Элчихона, шунингдек, Японияда қочқин мақомини олиш учун ариза топширганидан кейин мамлакатда узоқ вақт қолиш ёки ишлаш мумкинлиги ҳақида тарқалаётган маълумотларни рад этди. Бундай мақсадларда қочқин мақомини олиш учун ариза беришга йўл қўйилмайди.
Қочқин мақомини бериш рад этилган тақдирда, ариза берувчи иммиграция муассасасига жойлаштирилиши ёки депортация қилиниши мумкин.
Ёлғон маълумотларни тақдим этиш ёки қочқин мақомини ноқонуний усуллар билан олишга уриниш жиддий ҳуқуқий оқибатларга олиб келиши мумкин.
