Тошкент, Ўзбекистон (UzDaily.uz) — 27 октябрдан Урганч — Хива йўналишида янги замонавий троллейбуслар қатнай бошлайди. Янги транспорт воситаларининг ишга туширилиши йўловчиларнинг кутиш вақтини қисқартириш имконини беради: ҳаракат интервали 25 дақиқадан 12 дақиқагача камаяди. Бу ҳақда Ўзбекистон Транспорт вазирлиги хабар берди.
Янги ҳаракат таркибини ишга туширишга тайёргарлик инфратузилмани янгилаш билан бирга олиб борилди. 25 октябрь куни Урганч шаҳрида Xorazm Trolleybus Saroyi («Хоразм троллейбус саройи») давлат муассасасининг янги биноси очилди.
Троллейбуслар Урганч халқаро аэропорти, шаҳар темир йўл вокзали ва Хива темир йўл вокзалини боғловчи йўналишга хизмат кўрсатади. Йўловчи ташишни брутто-контрактлар тизими асосида ташкил этиш режалаштирилган.
Транспорт қатновини янгилаш жамоат транспорти сифатини ошириш ва Урганч билан Хива ўртасидаги транспорт алоқасини яхшилашга қаратилган.
