Хитойлик инвесторлар Фарғонада янги лойиҳаларни режалаштирмоқдалар

Тошкент, Ўзбекистон (UzDaily.uz) — Фарғонада вилояти ҳокими Хайрулло Бозоров бугун V Тошкент халқаро инвестиция форуми доирасида Хитойнинг "Shaanxi Puruida Industrial Group Co., Ltd." компанияси директорлар кенгаши раиси Чжан Юаньцин бошчилигидаги делегацияни қабул қилди.

Учрашувда хитойлик сармоядорлар иштирокида Фарғона вилоятида йирик инвестиция лойиҳаларини амалга ошириш, янги ишлаб чиқариш қувватларини ташкил этиш масалалари муҳокама қилинди.

Вилоят ҳокими Фарғонада инвесторлар учун қулай бизнес муҳити яратилгани, хорижий сармоядорларни қўллаб-қувватлаш бўйича зарур шарт-шароитлар мавжудлигини таъкидлади. Шунингдек, хитойлик инвесторлар билан ҳамкорликни янада ривожлантириш мақсадида махсус марказ ташкил этилгани қайд этилди.

Хитойлик инвесторлар компания фаолияти ҳақида маълумот бериб, Ўзбекистондаги лифтлар бозорини ўрганишгани, мазкур йўналишни ривожлантириш учун Фарғона вилоятидаги шарт-шароитлар юқори баҳоланганини билдириб, дастлабки босқичда вилоятда лифт ишлаб чиқариш лойиҳасини амалга ошириш ниятида эканликларини маълум қилишди.

Шунингдек, текстиль соҳасида ҳам ҳамкорлик қилишга қизиқиш билдирилиб, ўз ҳамкорларини Фарғонага жалб этиш ва қўшма лойиҳаларни йўлга қўйиш таклифи илгари сурилди. Компания тасарруфида йирик текстиль саноат зоналари мавжуд бўлиб, ишлаб чиқарилган маҳсулотларнинг асосий бозори Европа давлатлари ҳисобланади.

Вилоят ҳокими мазкур инвестиция лойиҳаларини амалга оширишда ҳар томонлама амалий кўмак кўрсатилишини билдирди.

"Shaanxi Puruida Industrial Group Co., Ltd." Хитойнинг Шэньси провинциясининг Анькан шаҳрида жойлашган кўп тармоқли саноат гуруҳи бўлиб, бугунги кунда лифт ишлаб чиқариш, кўчмас мулк девелопменти, электромеханик қурилиш, индустриал парклар бошқаруви ҳамда фойдали қазилмаларни ўзлаштириш йўналишларида фаолият юритади.