Вашингтонда қабул пайтида отишма содир бўлди

Тошкент, Ўзбекистон (UzDaily.uz) — 25 апрель кечқурун Вашингтонда Оқ уй мухбирлари ассоциацияси қабул маросими вақтида отишма билан боғлиқ ҳодиса юз берди. Унда АҚШ президенти Дональд Трамп иштирок этган. Бу ҳақда CNN телеканали хабар берди.

Манба маълумотларига кўра, тадбир Washington Hill меҳмонхонасида ўтказилган. Отишма бошланганидан сўнг президент, биринчи хоним Мелания Трамп ҳамда маъмурият вакиллари эвакуация қилинган.

Ҳодиса металлодетекторлар билан жиҳозланган асосий текширув нуқтаси ҳудудида содир бўлган. CNN маълумотига кўра, ҳужумчи қўриқчилар орқали ўтишга уринган, аммо Секрет хизмати ходимлари томонидан қўлга олинган. Агентлардан бири ўқдан жароҳат олган ва шифохонага ётқизилган.

Кейинчалик ҳуқуқни муҳофаза қилувчи органлар эҳтимолий отишмачининг шахсини аниқлади. У Калифорния штатида яшовчи 31 ёшли Коул Томас Аллен бўлиб, ўқитувчи сифатида ишлаган. Унинг ҳаракатлари сабаблари ҳозирча очиқланмаган.

Кейинроқ Дональд Трамп Оқ уйда брифинг ўтказиб, ушланган шахсни «жуда оғир руҳий ҳолатдаги одам» деб атади. Унинг сўзларига кўра, бир нечта турдаги қурол билан қуролланган эркак назорат-ўтказиш пунктидан ўтишга уринган, аммо «жуда жасур Секрет хизмати ходимлари» томонидан тўхтатилган.

Нутқи давомида Трамп шунингдек 2024 йил июль ойида Пенсильванияда ва ўша йил сентябрь ойида Флоридада содир бўлган суиқасд уринишларини эслаб ўтди ҳамда Америка жамиятини сиёсий кескинликни камайтиришга чақирди.

Сиёсий зўравонлик эҳтимоли ҳақидаги саволга жавоб берар экан, президент бу ҳақда доимий равишда хавотирланиб яшай олмаслигини айтиб, давлат раҳбари иши табиатан хавф-хатарлар билан боғлиқ эканини таъкидлади.

У ўз вазифаларини бажаришга тўлиқ эътибор қаратаётганини қайд этди ҳамда амалга оширилган ишлар ва мамлакат билан фахрланишини билдирди.