Тошкент, Ўзбекистон (UzDaily.uz) — Тошкентда пресс-тур доирасида журналистлар ва блогерлар Гулсарой кўчасида амалга оширилган ободонлаштириш ишлари билан танишди. Бу ҳақда Тошкент шаҳар ҳокимлиги хабар берди.
Узунлиги 1,6 километр бўлган кўча замонавий сайёҳлик ва гастрономик ҳудудга айлантирилмоқда.
Кўчада пиёдалар йўлаклари, яшил ҳудудлар ва суғориш тизими барпо этилди. Шунингдек, 58 та ёритиш устуни ва 46 та ўриндиқ ўрнатилди, қўшимча равишда 1,5 километр бетон тўсиқлар монтаж қилинди.
Пресс-тур давомида иштирокчилар аҳоли ва тадбиркорлар билан мулоқот қилиб, амалга оширилган ўзгаришлар улар учун қандай қулайликлар яратганини ўрганди. Мутахассислар амалга оширилган лойиҳа ва ҳудудни ривожлантириш бўйича келгуси режалар ҳақида маълумот берди.
Ҳокимлик маълумотларига кўра, ўзгаришларни жойида кўриш ва маҳаллий аҳоли фикрини эшитиш пресс-турнинг энг муҳим қисмларидан бири бўлди. Гулсарой кўчасига ташриф якунланганидан сўнг тадбир иштирокчилари йўналишдаги навбатдаги манзилга йўл олди.
