Тошкент, Ўзбекистон (UzDaily.uz) — Ўзбекистон Камбағалликни қисқартириш ва бандлик вазирлиги Туркиянинг Касбий малака органи (MYK) билан ҳамкорликда халқаро стандартларга мувофиқ малака баҳолаш ва сертификатлаштириш тизимини жорий этади. Бу ҳақда вазирлик хабар берди.
Тизим бешта йўналиш бўйича амал қилади: парвариш ва хизмат кўрсатиш, электротехника ва қуёш панелларини ўрнатиш, CNC дастгоҳлари оператори бўлиб ишлаш, қурилиш ишлари ҳамда сантехника.
Вазирлик ҳузурида фаолият юритаётган Малака баҳолаш марказлари базасида Туркияда аккредитациядан ўтган йирик марказларнинг филиалларини ташкил этиш режалаштирилмоқда.
Вазирлик маълумотларига кўра, янги тизим фуқароларга ўз касбий малакасини халқаро талабларга мувофиқ тасдиқлаш имконини беради ҳамда уларнинг меҳнат бозоридаги имкониятларини кенгайтиради.
