Тошкент, Ўзбекистон (UzDaily.uz) — Тошкентда Сеул шаҳрида жойлашган олий таълим муассасаси — Kwangwoon University’нинг Ўзбекистонда филиалини ташкил этиш лойиҳаси муҳокама қилинган учрашув бўлиб ўтди.
Тадбирда Тошкент шаҳар ҳокимлиги, олий таълим ва инвестициялар соҳаси вакиллари, шунингдек, Корея–Ўзбекистон бизнес ассоциацияси вакиллари иштирок этди.
Учрашувни Тошкент шаҳар ҳокими ўринбосари — Рақамли ривожланиш департаменти раҳбари А. Дусмухамедов ҳамда Ўзбекистон Вазирлар Маҳкамасининг фахрий маслаҳатчиси, Корея–Ўзбекистон бизнес ассоциацияси бош директори Эдвард Ким ўтказди.
Муҳокамада Тошкент шаҳар олий таълим, фан ва инновациялар бошқармаси бошлиғи Б. Ражабов, Turin Polytechnic University in Tashkent ректори О. Тўйчиев, Яккасарой тумани ҳокими ўринбосари Б. Мустафоев ҳамда Тошкент шаҳар инвестициялар, саноат ва савдо бошқармаси бўлим бошлиғи М. Абдурашитов ҳам иштирок этди.
Ташкил этилиши режалаштирилаётган филиалда сунъий интеллект, дастурий таъминот, компьютер ва ахборот муҳандислиги, ахборот конвергенцияси ҳамда робототехника йўналишларида замонавий таълим дастурлари ва илмий-тадқиқот фаолиятини ривожлантириш кўзда тутилмоқда.
Лойиҳани амалга ошириш учун Тошкент шаҳар инвестициялар, саноат ва савдо бошқармаси учта эҳтимолий жойни таклиф қилди.
Учрашув якунлари бўйича томонлар таклиф этилган вариантларни Kwangwoon University талабларини ҳисобга олган ҳолда ўрганиш, филиал учун мақбул жойни аниқлаш, таълим йўналишлари рўйхатини ҳамда инфратузилмага қўйиладиган талабларни аниқлашга келишиб олди.
Шунингдек, иштирокчилар лойиҳани амалга ошириш учун зарур бўлган кейинги босқичларнинг кетма-кетлигини белгилашни режалаштирмоқда.
