Тошкент, Ўзбекистон (UzDaily.uz) — Ўзбекистон Миллий истиқболли лойиҳалар агентлигида PASHA Financial Holding (PFH) бош директори Фарид Маммадов бошчилигидаги делегация ҳамда Business Consult Group вакиллари билан учрашув бўлиб ўтди.
Томонлар суғурта бозорини ривожлантириш, тартибга солиш тизимини такомиллаштириш ва электрон тижорат масалаларини муҳокама қилди. Бу ҳақда Ўзбекистон Республикаси Миллий истиқболли лойиҳалар агентлиги хабар берди.
Учрашув давомида иштирокчилар Ўзбекистон суғурта бозорини ривожлантиришнинг асосий йўналишлари, суғурта ташкилотлари устидан назорат қилиш ёндашувлари ва суғурта фаолиятини лицензиялаш тартибини кўриб чиқди.
Суғурта компанияларига қўйиладиган капитал талаблари ҳам алоҳида муҳокама қилинди.
Томонлар вакиллари, шунингдек, хорижий молиявий гуруҳлар ва инвесторларнинг мамлакат суғурта бозорига кириш шартларини кўриб чиқди.
Истиқболли йўналишлар қаторида суғурта соҳасини рақамлаштириш ва янги суғурта маҳсулотларини жорий этиш қайд этилди.
Музокараларнинг алоҳида қисми электрон тижоратга бағишланди. Иштирокчилар ушбу бозор субъектлари фаолиятини тартибга солиш масалалари, шунингдек, уни кенгайтириш учун зарур инфратузилмани янада ривожлантириш масалаларини муҳокама қилди.
PASHA Financial Holding молия сектори, кўчмас мулк, чакана савдо, қишлоқ хўжалиги, технологиялар ва бошқа йўналишларда фаолият юритувчи Озарбайжоннинг етакчи хусусий бизнес гуруҳларидан бири — PASHA Holding’нинг молиявий активларини бирлаштиради. 2025 йил якунларига кўра, гуруҳнинг жами активлари 17 миллиард доллар, умумий тушуми эса 3,5 миллиард долларни ташкил этган.
PFH таркибига PASHA Bank, Kapital Bank, Birbank, PASHA Insurance ва PASHA Life, шунингдек, маркетплейслар ва технологик компаниялар, кўчмас мулк, туризм, чакана савдо ва қишлоқ хўжалиги соҳаларидаги корхоналар киради.
Учрашув якунида томонлар суғурта бозори ва электрон тижоратни тартибга солиш ҳамда ривожлантириш соҳаларида тажриба алмашиш муҳимлигини таъкидлади.
Иштирокчилар ўзаро манфаатли йўналишлар бўйича ҳамкорликни давом эттиришга келишиб олди.
