Тошкент, Ўзбекистон (UzDaily.uz) — Тошкент вилояти ва Япониянинг Onodera User Run компанияси мутахассислар тайёрлаш ҳамда уларни Японияда ишга жойлаштириш соҳасидаги ҳамкорликни кенгайтириш масалаларини муҳокама қилди.
Музокараларни Тошкент вилояти ҳокими Зойир Мирзаев компания президенти Jun Kato билан ўтказди. Унда янги инвестициявий ва ижтимоий лойиҳалар, шунингдек, ҳамкорлик географиясини кенгайтириш масалаларига эътибор қаратилди.
Учрашув давлат раҳбарлари даражасида бошланган мулоқотнинг давоми бўлди. Аввалроқ Jun Kato Ўзбекистон Президенти Шавкат Мирзиёевнинг Тошкентдаги OUR BLOOMING ACADEMY таълим марказига ташрифи чоғида ҳам иштирок этган эди. Ўшанда у ўзбек ёшларини бепул касб-ҳунарга ўқитиш, малакасини ошириш ва кейинчалик ишга жойлаштириш дастурлари ҳақида маълумот берган.
Onodera User Run компанияси 2016 йилда Токиода ташкил этилган. У Филиппин, Мьянма, Индонезия, Лаос ва бошқа мамлакатларда кадрлар тайёрлаш лойиҳаларини амалга оширади. Компания фаолиятининг асосий йўналишлари хорижий фуқароларга япон тили ва касбий кўникмаларни ўргатиш, уларни Япония меҳнат бозорига чиқишга тайёрлаш ҳамда ишга жойлаштиришдан иборат.
2025 йил ноябрь ойида Тошкентда Our Blooming Academy Uzbekistan таълим маркази фаолиятини бошлаган. Ҳозирда бу ерда ёшлар умумий овқатланиш, кексаларга парвариш кўрсатиш ва автомобил бошқариш йўналишлари бўйича ўқитилмоқда.
Музокаралар давомида томонлар ушбу тажрибани Тошкент вилоятида ҳам жорий этиш имкониятларини кўриб чиқди. Хусусан, вилоят ҳокимлиги, Ўзбекистон Миграция агентлиги ва Onodera User Run ўртасида уч томонлама келишув имзолаш масаласи муҳокама қилинди.
Яна бир ташаббус Япония иш берувчиларининг талабларини ҳисобга олган ҳолда ҳайдовчилар тайёрлаш бўйича ҳудудда ўқув маркази ташкил этишни назарда тутади.
Томонлар таклиф этилаётган лойиҳалар ёшларнинг касбий кўникмаларини ошириш, уларнинг ишга жойлашишига кўмаклашиш ва Ўзбекистон ҳамда Япония ўртасидаги амалий ҳамкорликни кенгайтиришга қаратилганини таъкидлади.
