Тошкент, Ўзбекистон (UzDaily.uz) — Тошкент шаҳри Мирабод тумани жиноят ишлари бўйича суди томонидан вояга етмаган Д. Тўрғуновга нисбатан чиқарилган ҳукм ижтимоий тармоқларда кенг муҳокамаларга сабаб бўлди. Унда тайинланган жазонинг енгиллигига алоҳида эътибор қаратилмоқда. Бу ҳақда Тошкент шаҳар суди матбуот хизмати хабар берди.
Матбуот хизматида вояга етмаганлар томонидан содир этилган жиноят ишларини кўриб чиқиш ва уларга нисбатан жазо тайинлаш қонунчилик билан алоҳида тартибга солинишини таъкидлади.
Шу сабабли Д. Тўрғуновга нисбатан чиқарилган ҳукм ҳақидаги расмий ахборотда жиноят содир этилган вақтда у 16 ёшга тўлмагани алоҳида таъкидланган. Жиноят иши ёпиқ суд мажлисида кўриб чиқилган ва жазо Жиноят кодексининг 85-моддасида назарда тутилган тартибда тайинланган.
Тошкент шаҳар суди матбуот хизмати биринчи инстанция судининг ҳукми ҳақидаги расмий ахборотнинг ўзи шаҳар судининг позициясини акс эттирмаслигини маълум қилди.
Хабарда қайд этилишича, ҳукм устидан шикоят қилиш ҳуқуқи ва тартиби раислик қилувчи судья томонидан тарафларга тушунтирилган.
Бу, агар шикоят берилса, иш белгиланган тартибда юқори суд инстанциясида кўриб чиқилиши ва унга тегишли ҳуқуқий баҳо берилишини англатади.
Эслатиб ўтамиз, Мирабод тумани жиноят ишлари бўйича суди 2010 йилда туғилган, 16 ёшли Д. Тўрғуновни жабрланувчининг ўлимига сабаб бўлган қасддан баданга оғир шикаст етказишда айбдор деб топган. Суд Жиноят кодексининг 104-моддаси 3-қисми «д» банди асосида унга 2 йил 4 ой муддатга озодликдан маҳрум қилиш жазосини тайинлаган.
Жазо муддати 2026 йил 27 февраль — маҳкумга нисбатан қамоққа олиш тарзидаги эҳтиёт чораси қўлланган кундан бошлаб ҳисобланади.
Эслатиб ўтамиз, 25 февраль куни кечқурун хусусий мактабнинг 10-синфида ўқиган, ҳайдовчилик гувоҳномасига эга бўлмаган ўсмир BMW M4 автомашинасини бошқариб, хизмат вазифасини бажараётган йўл-патруль хизмати инспектори Ҳосилбек Эшназаровни уриб юборган. Жабрланувчи оғир аҳволда шифохонага ётқизилган ва кейинчалик вафот этган.
Эшназаров 1993 йилда Қашқадарё вилоятида туғилган. У ички ишлар органларидаги хизматини 2022 йилда бошлаган. Унинг уч нафар фарзанди қолган.
Текширув давомида вояга етмаган шахс аввал ҳам ҳуқуқбузарликлар учун жавобгарликка тортилгани аниқланган. Жумладан, мактабда дарс қолдириш, автомашинани ўзбошимчалик билан бошқариш ва йўл ҳаракати қоидаларини қўпол равишда бузиш ҳолатлари қайд этилган. Унинг ота-онасига ҳам маъмурий жазолар қўлланилган.
Йўл-транспорт ҳодисаси содир этилган автомашина 2024 йилдан буён транспорт воситасини бошқариш ҳуқуқига эга бўлмаган шахсларга 18 марта бошқарувни топширгани ва йўл ҳаракати қоидаларини 37 марта қўпол равишда бузгани аниқланган қиз номига рўйхатдан ўтказилган.
