Тошкент, Ўзбекистон (UzDaily.uz) — Ўзбекистон Миллий кинология маркази ва Буркина-Фасо Божхона хизмати кинология маркази 7-Глобал кинология форуми доирасида ҳамкорлик истиқболларини муҳокама қилди. Учрашув тажриба алмашиш, хизмат итларини тайёрлаш ва мутахассислар малакасини ошириш масалаларига бағишланди. Бу ҳақда Божхона қўмитаси матбуот хизмати хабар берди.
Икки марказ вакиллари кинология соҳасидаги ҳамкорликнинг эҳтимолий йўналишларини, жумладан, амалий тажриба алмашиш ва хизмат итларини тайёрлаш масалаларини кўриб чиқди. Кинолог-мутахассисларнинг касбий ривожланишига алоҳида эътибор қаратилди.
Буркина-Фасо делегацияси, шунингдек, Ўзбекистон Миллий кинология маркази фаолияти билан танишди ва бу ерда етиштирилиб, ўқитилаётган хизмат итларига қизиқиш билдирди.
Буркина-Фасо Божхона хизмати вакиллари Ўзбекистондан хизмат итларини харид қилиш ва ушбу йўналишдаги ҳамкорликни ривожлантиришдан манфаатдор эканини билдирди.
Учрашув якунлари бўйича томонлар кинология соҳасидаги алоқаларни давом эттириш ва амалий ҳамкорликни ривожлантиришга тайёрлигини тасдиқлади.
