Тошкент, Ўзбекистон (UzDaily.uz) — Тошкент метрополитени кунлик йўловчилар оқими 1,2 миллион кишидан ошгани шароитида поездлар ҳаракати орасидаги интервалларни қисқартириш ва йўловчилар учун қулайликларни яхшилаш устида ишламоқда. 2026 йилда метро учун 14 та замонавий поезд таркиби харид қилиниб, фойдаланишга топширилди. Бу ҳақда «Тошкент метрополитени» АЖ хабар берди.
Баёнот ижтимоий тармоқларда метронинг юқори даражада бандлиги туфайли юзага келаётган ноқулайликлар ҳақидаги хабарлар тарқалгани муносабати билан эълон қилинди.
Компания маълумотларига кўра, 2021 йилда метрополитен хизматларидан бир кунда ўртача 280–300 минг киши фойдаланган. 2026 йилга келиб, кунлик йўловчилар оқими 1,2 миллион кишидан ошди.
Компанияда йўловчилар оқимини самарали бошқариш, поездлар ҳаракати хавфсизлигини таъминлаш ва йўловчилар учун қулайликни ошириш бўйича чоралар кўриш давом эттирилаётгани маълум қилинди. Янги поезд таркибларидан фойдаланиш хизмат кўрсатиш сифатини яхшилаш ва поездлар орасидаги интервалларни босқичма-босқич қисқартиришга хизмат қилиши керак.
Бундан ташқари, «Тошкент метрополитени» АЖ яқин кунларда оммавий ахборот воситалари вакиллари учун матбуот анжумани ўтказишни режалаштирмоқда. Унда поездлар ҳаракатини ташкил этиш, йўловчилар оқимини бошқариш ва юзага келаётган ноқулайликларни бартараф этиш бўйича кўрилаётган чоралар ҳақида батафсил маълумот берилади.
Оммавий ахборот воситалари вакиллари масъул мутахассисларга саволлар беришлари мумкин. Матбуот анжуманининг санаси, вақти ва жойи қўшимча равишда эълон қилинади.
